Jowai, Rymphang 19
Da kaba sah sa tang shisngi ban poi sha ka jingjied ïa ki nongmihkhmat sha ka Jaiñtia Hills Autonomous District Council (JHADC), napdeng ki 241 tylli ki kynhun, la don haduh 59 tylli kiba la mih na Head Quarter na Jowai ban leit sha ki jaka thep vote bapher-bapher jong 19 tylli konstitwensi kiba hap hapoh West Jaiñtia Hills District.
Kine ki kynhun ki la mih ha ka 19 tarik Rymphang da kaba rah lang ruh ïa ki Electronic Voting Machines (EVM) lem bad ki jingdonkam baroh kiba donkam ha ki polling station nalor ki nep ki tung. Katba 182 tylli ki kynhun kin mih biang lashai ka sngi ka 20 tarik, hadien ba ki la pyndep ïa ki kot ki sla ba donkam ha shlem treikam u Deputy Commissioner.
