Shillong, Rymphang 19
Napdeng ki 2146 tylli ki polling station kiba hap hapoh ka Khasi Hills Autonomous District Council (KHADC) bad Jaiñtia Hills Autonomous District Council (JHA DC) haduh 224 tylli ki polling station ki dei kiba kham don jingma bad kiba lah ban mih jingkulmar.
Ka jingjied ïa ki nongmihkhmat sha ka ïingdorbar jong ka KHADC bad JHADC kan long ha ka 21 tarik mynta u bnai hadien ba ka jingïalap jong baroh ki kyrtong bad ki seng saiñ pyrthei ka la kut noh ha ka janmiet jong ka 19 tarik mynta u bnai.
Katkum ka jingpyntip jong u Commissioner & Secretary ka tnat District Council Affairs (DCA) Bah Cyril Diengdoh la ong ba napdeng ki 2146 tylli ki polling station, 1669 ki hap hapoh u pud u sam jong ka KHADC bad 477 tylli ki polling station hapoh ka JHADC. Kumta na ki 1669 tylli ki polling station ha KHADC, ki don haduh 129 tylli kiba kham don jingma, katba na ki 477 tylli ha JHADC ki polling station kiba kham don jingma, ki don kumba 95 tylli.
U Bah Cyril u la ïathuh ba halor kine, yn buh bad pynkhlaiñ ïa ki bor pahara ha kine ki jaka ban pynthikna ba ka jingjied ïa ki nongmihkhmat ha kane ka ilekshon kan long kaba ïaid beit ïaid ryntih.
Shuh shuh u Bah Cyril u la ong, “Baroh ki jingpynkhreh ki la biang lut. Ngi la shong jingïalang bishar kam la bunsien bad ki Deputy Commissioner, kiba pynïaid ïa ka ilekshon. Ki buit halor ka rukom pahara ruh ka la biang lut. Ki Deputy Commissioner kila ithuh ïa ki jaka kiba lah ban mih jingkulmar bad ba don jingma ha kaba la buh kham buh ki bor pahara ha ryngkat ka jingïasyllok bad ki SP”.
U la ong ruh ba “Ki pulit ki la sngewskhem ban lah pynïaid beit ïa ka ilekshon naba ki la wanrah bun ki bor pahara kynthup na ki home guard bad kumta, kam don jingduna satia” bad bynrap “Ïa kine ki bor pahara la wanrah na kylleng ki jaka ka Jylla bad naba ka ilekshon ka long ha Eastern Range, la wanrah bun ki bor pahara na Ri-lum Garo kaba dei ka Western Range ka Jylla.”
U la pyntip ruh ba na ka liang jong u Chief Secretary ka jylla ruh u la leit jurip ruh ïa kawei na ki centre ha Shillong kaba dei ha ISBT, Mawiong, kaba mih ki nongpynïaid ïa ka ilekshon ryngkat ki tiar ki tar bad ruh ka jingñiew vote ka ban long la 24 tarik Rymphang.”
Ka ‘Silent Period’ ne ki kynta jar jar, ka la treikam hadien ka jingkut noh jong ka jingïalap ilekshon kaba la shah haduh ka 4 baje janmiet jong ka 19 tarik mynta u bnai. Kane ka ‘silent period’ kan treikam 48 kynta kata naduh ka 4 baje janmiet jong ka 19 tarik haduh ka 4 baje janmiet jong ka 21 tarik mynta u bnai. Hapdeng ka jingtreikam jong ka ‘silent period’ la khang pyrshah ïa kino kino ki jingïalap ilekshon, jingïalang paidbah, ka jingïaid proseshon, ka jingpyndonkam da ki tynghung pynsawa bad kiwei kiwei, nalor ki jingpyni ïa ki kam ilekshon lyngba ki TV, ki lad pathai khubor (print and electronic media) lane da kiwei kiwei ruh ki bynta.
