Tura, Rymphang 19
Ka Achik State People’s Front (ASPF) – Garobadha Regional Unit ka la ujor sha ki pulit halor kaei kaba ka ñiew ba ki dei ki nongshong shnong be-aiñ, kiba la kynnoh ba ki dei na Bangladesh bad Assam ha ka shnong Tiksali kaba hap hapoh u pud u sam jong ka Garobadha OGC ha SWGH.
Kane ka shnong ka don hajan khappud bad ka Assam.
Ha ka ejahar ba la ujor ha ka Sngi Balang, ka ASPF ka la pynskhem ba kine ki nongshong shnong ym tang ba ki don hapoh ka shnong kaba hap hapoh Meghalaya khlem ki kot ki sla kiba biang hynrei ka jingdon jong ki, ka la wanrah ka jingthut ha ka imlang-sahlang jong ka thaiñ bad ka jingkiew ha ki kam ba long pyrshah ïa ka imlang-sahlang.
“Ki la wanrah ïa ki jingeh kiba bun kynthup ïa ka jingshah tuh jong ki mar ki mata, ki masi bad ki syiar na ki nongshong shnong kiba don hangtei. Ngi dawa ïa ka jingtohkit halor kane ka kam khnang ba ïa kito kiba shong be-aiñ, lah ban beh noh ïa ki bad ban leh ïa kaba donkam katkum ka aiñ”, ong ka ejahar jong ka seng.
