Shillong, Rymphang 20
Ka ïingbishar Meghalaya High Court ka la hukum ïa ka Sorkar Jylla ba kan thung ïa ka jingtohkit halor ka jingkynnoh tih mawshun beaiñ ha Rilum Jaiñtia da ka Amrit Cement Industries Limited.
Ïa kane ka hukum la pynmih da ka ïingbishar Division bench ba kynthup ïa u Chief Justice IP Mukerji bad u Justice W Diengdoh hadien ba shong bishar ïa ka PIL ba mudui da u Ranjit Chandra Goswami.
“Ha kane ka khyllipmat ha shwa ban pynmih ïa kano-kano ka hukum, ngi kwah ban ïohsngew na u nongshah mudui no.9 bad ka jingwan mih u nongshah mudui ïa uba la dep hukum ban phah ïa kane ka hukum. Ïa mynta, ngi bthah ïa ka Jylla ban shim ïa kane ka mudui kum ka jingujor, ban pynlong ïa ka jingtohkit bad ban aiti ïa ka kaiphod sha kane ka ïingbishar ha shwa ka sien shong bishar biang. La bthah ruh ba dei ban ai byrta ïa ka nongshah mudui no.9 kaba dei ka Amrit Cement Industries Limited,” ong ka ïingbishar. Ka la bthah ruh ïa ka jingshakri jong ka Meghalaya State Pollution Control Board (MSPCB) bad ka North Eastern Development Finance Corporation Ltd. La bthah ïa u nongmudui ba un ai ïa ka affidavit ba bniah halor ka kam ba u trei ha shwa ban shong bishar kam.
Ka hukum ka ong ba une u nongmudui, uba kam ba u dei u briew ba don ka mynsiem ban shakri paidbah, u la kynnoh ba ka Amrit Cement Industries Limited ka la leh ïa ka kam tih mawshun beaiñ ha Rilum Jaiñtia.
