Shillong, Rymphang 20
Ka pali jong ki kyrtong bad ki seng saiñpyrthei ban sei ïa la ki nia ki jutang bad ban pynshai nongrim ïa ki mat ka la kut. Mynta ka la dei pat sa ka pali jong palat 13 lak ngut ki nongshong shnong ban jied ïa ki 29 ngut ki MDC napdeng 158 ngut ki kyrtong kiba aireng ha ka ilekshon sha Khasi Hills Autonomous District Council (KHADC) bad ïa 29 ngut ki MDC napdeng 114 ngut kiba aireng sha Jaiñtia Hills Autonomous District Council (JHADC).
Ka jingpynbna ïa ki nongjop kan long ha ka sngi Nyngkong ka 24 tarik Rymphang.
Ha Khasi Hills Autonomous District Council (KHADC) ki kynthei ki kham bun ban ïa ki shynrang bad napdeng 9,96,518 ka jingdon ki nongjied, 5,15,257 ki dei ki kynthei katba 4,81,268 ngut ki shynrang. Ka konstitwensi kaba heh duh bad bun tam ki nongjied ka dei ka Mawlai konstitwensi kaba don haduh 49,841 ngut ki nongjied, katba ka Jaïaw konstitwensi ka dei kaba rit duh bad don tang 17,148 ngut ki nongjied.
Ha Jaiñtia Hills Autonomous District Council (JHADC) ka jingdon ki nongjied ka long 3,12,300 ngut. Ka konstitwensi kaba bun tam ki nongjied ka dei ha Muthlong-Sohkymphor kaba don 14,167 ngut bad kaba duna duh ka dei ha Sumer kaba don tang 8,305 ngut.
Ha kane ka ilekshon MDC kiba bun ki seng saiñpyrthei ki la sei ïa ki kyrtong kynthup ïa ka Khun Hynñiewtrep National Awakening Movement (KHNAM) kaba khlem pynïeng kyrtong ha ka ilekshon MLA 2023. Kiwei ki seng saiñpyrthei kiba la mih sei ïa ki kyrtong ki kynthup ïa ka seng ba ïalam ïa ka Sorkar, ka National People’s Party (NPP), United Democratic Party (UDP), Indian National Congress (INC), Hill State People’s Democratic Party (HSPDP), Bharatiya Janata Party (BJP), Voice of the People Party (VPP) bad ki kyrtong shimet, katba ka All India Trinamool Congress (AITC) kaba don 4 ngut ki MLA bad don ruh ïa u Nongïalam Liang Pyrshah hapoh Ïingdorbar Thaw Aiñ ka khlem pynïeng kyrtong satia ha kane ka ilekshon sha ki district council.
Na ka liang ka Sorkar Jylla ka la dep ban pynbit pynbiang na ka bynta mynta ka sngi kumjuh ha ka sngi ñiew vote. Ban shngaiñ shuh shuh ha kane ka ilekshon ka la wanrah ruh ïa ki bor pahara na Garo Hills na ka bynta ban pahara ha kane ka ilekshon ha Khasi Hills bad Jaiñtia Hills khnang ban pynthikna ba ka ilekshon kan long kaba ïaid beit ïaid ryntih.
