Shillong, Rymphang 20
Ka jingshah tuh jong ki arshaka bad kali ka dang ïai bteng na kawei ka sngi sha kawei. Jan man ka sngi yn sakhi ba ka don beit ka jingshah tuh ki ar shaka na kylleng ki bynta jong ka nongbah, haduh ba kum ki trai kim shngaiñ shuh ban pynïeng hangno-hangno ruh.
Katkum ka khubor na ki pulit la ong ba u Bah Lambert Nongkhlaw u la ai ka jingujor ba ha ka janmiet jong ka 18 tarik mynta u bnai ha ka por kumba 5.30 eiei, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-S-4288 na ka jaka pynïeng kali ka tnat PHE kaba don ha Lawmali Pyllun, Shillong.
Ha kawei pat ka khubor, u Ramesh Rai u la ujor ba ha ka step jong ka 19 tarik mynta u bnai, ki runar bym lah ban ithuh ki la tuh ïa ka kali ka jong u, kaba don ïa u registration number ML05-Q-9441 na ka thaiñ Upper Shillong. Kane ka kam mynta ka dang don hapoh ka jingtohkit.
Ha kawei pat ka khubor, u Party Commander, A-Coy jong ka 4th Bn., BSF, BOP Hawaitilla u la ujor sha ki pulit ba ha ka 18 tarik mynta u bnai ha ka por kumba 6.30 janmiet, ki shipai BSF ki la ïoh ban kurup noh haduh 25 tylli ki masi kiba khlem don nongkam na ka jaka hajan jong ka near BP No. 11286/MP ha West Jaiñtia Hills. Kane ka kam mynta ka dang don hapoh ka jingtohkit.
