Shillong, Rymphang 21
U Working President ka Meghalaya Pradesh Congress Committee (MPCC) uba dei ruh u MDC bad kyrtong na Mawkhar-Pynthorumkhrah konsti-twensi, Bah Pynshngaiñ N Syiem u la kren shai kdar ba lada ka seng Congress ka jop bun ngut ki MDC kan ym treh satia ban ïatreilang bad ka National People’s Party (NPP) hapoh ka executive committee.
U la ong ba ka sur jong u babun balang ka paw shai, na ka liang ki nongtrei jong ka seng bad ki paidbah nongshong shnong ba kim da kwah shuh ban ïatreilang bad ka NPP.
“Katkum ka mon jong u babun balang ngim kwah ban ïatreilang bad ka NPP, hynrei bad kiwei-kiwei ki seng ngin kloi ban ïatrei bad ngi hap ban shong ban ïakren ïa kane ka kam, ngi hap peit kaei ka jingmih bad ki nombar. Lada ym don ba jop bun bad donkam 3-4 tylli ki seng ban ïatrei, ïa kata ngin sa hap ban da ïakren bha shwa”, la ong u Nongïalam ka Congress ha ka Sngi Thohdieng hadien ba la pyndep ïa ka jingthep vote.
U Bah P.N Syiem uba dei ruh u Deputy Chief Executive Member (Dy. CEM) barim, u la ong ba ha kane ka kynti ki mat ba kham kongsan ki long ban pynbha bad pynjanai ïa ka jingtreikam jong ka district council.
U la ong ba kawei pat ka mat ka dei ban shim khia ha kaba ïadei bad ka jingpynkylla hapoh ka Khyrnit ba Hynriew, ban bsut katto-katne ki jingmut na ka Article 371.
“Ha kaba ïadei bad ki marpoh khyndew, ngi lah ban bsut lang ïa ka Para 3A, kam dei ban mih tang ka ‘Land’ ka dei ban mih lang ka ‘Mineral Resources’, kumjuh ha ka Para 12A ba ki aiñ jong ka Sorkar kin ym lah ban treikam ha ki bynta ba la don ha ka Para 3. Kata ka dei kaba kham kongsan duh tam na baroh”, la ong u CEM barim ka KHADC. U Bah PN Syiem u la ong ba kumba ka long mynta ki briew ki ïakren bha ïa ka Article 371, bad bynrap ba um sngewdei ban pynkhlaiñ ïa ka Article 371, hynrei dei ban pynkhlaiñ ïa ka Khyrnit ba Hynriew na ka bynta ka jingbit jingbiang ki briew ka Jylla, da kaba bsut katto-katne ki jingmut na ka Article 371 hapoh ka jingpynkylla ïa ka Khyrnit ba Hynriew khnang ba ki paidbah kin long shngaiñ ha la ka jaka la jong.
