Khliehriat, Rymphang 21
Namar ka jingpynjot-jingpynjulor ïa ki kor Electronic Voting Machine (EVM) kaba la jia ha ka Wapungskur bad ha ka shnong Bataw, u District Magistrate jong ka East Jaiñtia Hills District, Khliehriat ha ka 21 tarik Rymphang u la pyntreikam da ka Section 163 BNSS ha baroh kawei ka shnong Wapungskur bad Bataw ka ban treikam shi syndon.
Ha ka hukum u District Magistrate u la ong ba kum kine ki kam ki lah ban dang ïai bteng, kaba buh jingma kaba khraw ïa ka shongsuk shongsaiñ jong ki paidbah bad ka lah ruh ban nangkiew shuh-shuh ka jingthombor kaba buh jingma ïa ka jingim bad ki mar ki mata.
Ka hukum ka la khang ïa ka jingïalum palat san ngut hapoh bad sawdong jong ka shnong Wapungskur bad Bataw, lait noh ha ‘Polling Station’ tang na ka bynta ban thep ‘vote’.
La khang ban rah ïa ki tiar ïaleh ne tiar pynmynsaw hapoh bad sawdong jong ka shnong Wapungskur bad Bataw, lait noh tang ki briew jong ka aiñ.
La khang ïa kano-kano ka jingleh jong ki ‘riewshimet ne ki kynhun kiba khanglad ïa ka ïaid laitluid jong ki briew.
La khang ruh kano-kano ka jingleh jong ki ‘riewshimet ne ki kynhun kiba pynthut ïa ka shongsuk shong shngaiñ bad ka jingsuk jingsaiñ jong ki paidbah.
Ha kawei pat ka liang, ka tnad District Council Affairs (DCA) ka la pynmih ïa ka hukum ban pynlong biang ïa ka jingthep ‘vote’ ha ki saw tylli ki jaka thep ‘vote’ kiba hap hapoh ki ar tylli ki konstitwensi ha East Jaiñtia Hills District hadien ba ki paidbhur ki bym lah ban ithuh ki la rung jubor bad pynjulor ïa ki Electronic Voting Machine.
Ka jingthep ‘vote’ kan long ha ka Sngi Saitjaiñ, 22 tarik Rymphang naduh ka por 7 baje mynstep haduh ka por 4 baje janmiet hapdeng ka jingpahara kaba jur.
Ki jaka thep ‘vote’ ki ban leit thep ‘vote’ biang ki kynthup ïa ka Wapung Skur-A bad Wapung Skur-B kiba hap hapoh ka Musniang-Rangad konstitwensi bad ka Bataw A bad Bataw B kiba hap hapoh ka Bataw-Lakadong konstitwensi.
