Nongpoh, Rymphang 21
Kum shi bynta ban pynlong ïa ka surokbah kaba shngaiñ ïa ki paidbah nongleit nongwan, ki pulit jong ka Ri-Bhoi District mynta ka sngi, ki la pyntip paidbah ba ki nongñiah trok kim dei satia ban ïaid na ka liang kamon jong ka surokbah namar kan pynlong ïa ki kali rit da ka jingbym banse ban tam shakhmat (overtake) lyngba ka liang ka bym dei (wrong side) bad wanrah ruh bunsien ïa ki jingjia ba sngewsih.
Katkum katei ka jingpynbna kaba la pynmih ha ka sla ‘Facebook’ jong ki pulit ka Ri-Bhoi District, la bthah ïa ki nongñiah trok ba ki dei ban ñiah beit tang sha ka liang kadiang jong ka surokbah bad kin ñiah sha ka liang kamon jong ka surokbah tang lada ki hap ba tam shakhmat (overtake) ïa kiwei pat ki kali.
“Ngin daiñ kuna kaba jur lada ngi shem kano-kano ka trok kaba kah ïa ka liang ka mon jong ka surokbah,” la maham ki bor pulit ka Ri-Bhoi District lyngba katei ka jingpynbna paidbah.
