Shillong, Rymphang 23
Haba talasi hadien ba la ïoh jingtip ba thikna, ki shipai ïada khappud Border Security Force (BSF) Meghalaya ki la ïoh khanglad bad kem ïa kiba bun ki briew kiba pyrshang ban prong tuh ïa u pud u sam jong ka Ri bad ka Jylla.
Ha kane ka jingkhynra ki shipai BSF ki la ïoh bat 4 ngut ki nong Bangladesh najan khappud ka thaiñ West Jaiñtia Hills.
Ha kawei ka jingkhynra, ki shipai BSF ki la ïoh ban kem sa 2 ngut ki nong Bangladesh najan khappud ka South Garo Hills.
Ïa kine ki jingkhynra la pynlong kum shi bynta jong ki shipai BSF Meghalaya ban khanglad ïa ka jingwan rung kyrthep beaiñ bad kiwei-kiwei ki kam sniew ha ki thaiñ pud.
Ha ka jingïaid lynti ban peitngor ha ki thaiñ khappud ki shipai BSF jong ka 4th & 1st Battalion ki la ïohi ïa ka jingïaid laitlan ki briew ha khappud bad ki la ïoh ban kem ïa ki 6 ngut ki nong Bangladesh.
Ïa kine ba shah kem la aiti noh sha ki thanat ba dei peit ban pynngat ha ki kyndon aiñ.
Ha ka jingtohkit la lap ba don napdeng kine kiba shah kem, ki dei kiba trei kum ki nongshna ïing ha Basantpur, Mumbai, katba kawei ka kynthei na Bangladesh, ka la leit sha Mumbai, na ka bynta ban leit sumar ïa la u kurim.
Ha kawei pat ka jingjia ha South Garo Hills, ki BSF ki la ïoh kem uwei nong Bangladesh ba thmu rung sha India.
