
Shillong, Rymphang 23
U General Secretary ka Bharatiya Janata Party (BJP) na Meghalaya, Bah Wankitbok Pohshna u la ong ba ki kyrtong jong ka seng ki la trei shitom bha ha kane ka ilekshon MDC bad na ka liang ka BJP ka khmih lynti ba kan ïoh jingjop ha katto-katne tylli ki konstitwensi, bad ïa kane yn sa khmih ïa ka rai jong u paidbah ha ka 24 tarik u Rymphang.
Ha ka jingïakren bad ki nongthoh khubor, u Bah Pohshna u la ong ba ka BJP ka don ïa ka jingkyrmen ban kan poi sha ka thong ha ki katto-katne tylli ki konstitwensi. U la ong ruh ba ka jingmih shakhmat jong ka BJP ha kane ka kynti ba mynta ban ïakhun ïa ka ilekshon ka long ban wanrah ïa ka jingkylla ki ban long katkum ki mat treikam jong ka seng.
Ha kaba ïadei bad ka jingslem ban pynbna ïa ki kyrtong ha kane ka ilekshon, u la ong ba kane kam dei eh ka daw namar ba ka seng ka trei beit man ka sngi kata baroh san snem. Ka jingpynslem ban pynmih kyrteng kam da dei eh ba kan ktah ïa ki kyrtong hynrei lada ki paidbah ki peit ïa ki kam babha kiba ka seng ka leh kane kam don jingeh eiei ban jied ïa ki kyrtong ka seng ba ka la dep ban pynbna.
“Ka jingshaniah ka dei ban long na ki kam babha kiba ka seng ka tyrwa bad lada ki paidbah ki sngewthuh kam da eh than ïa ki paidbah kin ai ka jingshaniah ïa ki kyrtong bad ki kyrtong ynda ki la jop ki hap ban ïaid katkum ka jingbthah jong ka seng”, u la ong.