Shillong, Rymphang 23
Ka Shillong All Faiths Forum (SAFF) ha ka Sngi Saitjaiñ jong ka taïew ba la dep ka la ïoh ban pynlong ïa ka jingïakynduhlang ban pynthymmai ïa ki nongkitkam. Ha kane ka jingïalang ki la pynpaw ruh ïa ka jingsngewnguh ïa u Myntri ka Tnad Social Welfare kumjuh ïa ka DREAM Mission kaba la ai bynta ïa ka SAFF ha ka ban ïakhun pyrshah ïa ka jingjyllei ka jingdih drok ha ka jylla.
Ha ka kyrwoh ba la phah da u General Secretary ka SAFF, Bah Noor Nongrum u la pyntip ba na ka liang ka kynhun ka pynpaw ka jingsngewnguh ïa ka tnad Social Welfare kumjuh ïa u Myntri ka tnad u Bah Paul Lyngdoh halor ka jingïalang kaba dang long shen na ka bynta ka jingïatreilang jong ki bad ki nongïalam niam ha ka jingïakhun pyrshah ïa u drok ha ka Jylla.
“Ka SAFF ka don ïa ka jingshaniah ha ka sorkar lyngba ka ‘projek jong ka Drug Rehabilitation Elimination and Action Mission (DREAM) hapoh ka jingïalam jong u Mission Director Bah Francis G. Kharshiing bad kular ban ai ka jingkyrshan ba pura ha kaba ïakhun pyrshah ïa ki jingsniew ha ka imlang ka sahlang” u la ong.
Ka SAFF ka kyntu ïa baroh ki dkhot bad ki shnat trei kam ban pan jingïarap na ka sorkar ha ka ban pynlong ïa ki prokram pynsngewthuh paidbah bad rehabilitation programs. Ka kynhun ka pynshlur ruh ïa ki jaka pule bad ki balang ban kin ai ka jingïatreilang bad ki ‘riewshemphang khnang ba yn lah ban pyndonkam hok ïa ki lad ki lynti ha ka ban ïakhun pyrshah ïa u drok.
Ka SAFF ka la pynthikna ruh ban ai ka jingïatreilang, da kaba pynksan ïa ka jingdonkam ha ka jingïatreilang bad ka jingïatylli khnang ba yn lah ban tehlakam ïa ka jingma jong u drok ha ka imlang-sahlang.
Ka SAFF ka la pynthymmai ruh ïa ki nongkitkam ha kaba u Bishop P Lyngdoh u la long kum President, Vice President Naba Bhattacharjee, General Secretary Bah Noor Nongrum, Assistant General Secretary Arup Barua, Treasurer Jasbir Singh and u Rev. Kharkongor ‘Media Assistant’.
