Shillong, Rymphang 23
Hadien ka jingkheiñ antad baroh shi katta, ki paidbah kin sa tip shai noh mano napdeng 272 ngut ki kyrtong kiba ïakhun ha kane ka ilekshon ki ban shah jied kum ki dkhot sha ka Ïingdorbar Thawaiñ jong ka Khasi Hills Autonomous District Council (KHADC) bad Jaiñtia Hills Autonomous District Council (JHADC) ynda la ñiew ïa ki vote ha ka Lah Sngi U Blei na baroh 58 tylli ki konstitwensi kiba la leit sha ka jingthep vote ha ka 21 tarik Rymphang.
Ka jingñiew ïa ki vote ha ki jaka ba la pynkhreh ha kylleng ka Ri-Khasi Jaiñtia kan sdang ha ka por 8 baje mynstep ka ban sdang nyngkong ban ñiew ïa ki ballot paper ne ki vote kiba la dep ban ai shwa da kito ki nongtrei Sorkar kiba la hap leit pyndep ïa ka kam pynïaid ilekshon sha kylleng ki polling station bad bud sa ka jingñiew ïa ki vote tang na ki kor EVM.
Kumba ka long mynta ki don haduh 272 ngut ki kyrtong kiba la mih shakhmat ban ïakhun ha kaba ki paidbah ruh ki la dep ban ai ïa ka rai bad kaba sah ka dei sa tang ban ñiew ïa ki vote. Mano napdeng ki 272 ngut kiba kynthup ruh 24 ngut ki kynthei kiba la ïakhun kata 12 ngut sha KHADC bad 12 ngut sha JHADC ki ban poi sha ka thong bad mihkhmat na ka bynta san snem ïa la ki konstitwensi.
Ki konstitwensi kiba don kham bun ki jaka thep vote bad ki nongthep vote, ki lah ban kham shimpor ban pyndep ïa ka jingñiew vote.
La antad ba ïa ki nongjop yn sa tip la kumno-kumno hadien ka 11 ne 11.30 baje mynstep bad ha ka por shiteng sngi, yn sa ïoh ïa ka jingtip kaba shai mano ba jop bad mano ba rem.
Na ka liang ki bor pynïaid ilekshon ka jylla ruh ki la pynkhreh ïa ka jingpahara kaba jur ban peitngor bha ba kan ym don kano-kano ka jingmih jingkulmar, ki ban pahara sawdong ïa ki jaka ñiew vote nalor ki jaka shabar ba ki paidbah kin ïalum ha ISBT Mawïong bad ha kiwei ruh ki jaka, ki ban ap ïa ka khubor na ki jaka ñiew vote la ki kyrtong jong ki kin poi ne em sha ka thong.
Ha kane ka ilekshon dei tang ka VPP kaba la pynïeng kyrtong ha baroh 58 tylli ki konstitwensi, katba kiwei ki seng kim shym la pynïeng lut.
Katkum ka jingpeit pyrman ba ka jingïakhun ha kane ka kynti kan long kaba itynnad bha bad ruh kaba kham pher na kiwei pat ki ilekshon namar ka la eh shisha ban ïoh jingkheiñ. Kaei ka seng ka ban lam khmat ïa ki ar tylli ki district council hadien ka jingïashim bynta ha ka sien ba nyngkong jong ka VPP ha ka jingïakhun ïa kane ka ilekshon. Lah ban kynmaw ba ha ka ilekshon MP, ka jingjop kput jong u kyrtong ka VPP ka la pynkylla lut ïa ki jingmut jingpyrkhat bad khamtam lei ïa ki nongkheiñ jingkheiñ hynrei wat ha kiba bun ki konstitwensi wat ki Nongïalam ka VPP ruh kim lah ban mih jingkheiñ bad ka rai mano ban ïalam bad synshar yn sa tip beit bad shai kdar ha ka 24 tarik.
