Shillong, Rymphang 23
U nongaiktien ka National People’s Party (NPP) Bah HM Shangpliang u don jingkyrmen ba ka NPP kan ïoh ban synshar biang ïa ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC).
Haba ïoh ban ïakren bad u Bah Shangpliang ha shwa ban ñiew ïa ka vote ha ka 24 tarik mynta u bnai, u la pynpaw ba ka NPP ka don ka jingsngew shngaiñ bad sngewkmen ba kan ïoh synshar biang ha kine ar tylli ki district council.
U la ïathuh ba katkum ki khubor ba la ïoh lum na ki nongkitkam na ki konstitwensi kin bun ki kyrtong ban jop namar ki paidbah ki ai jingkyrshan namar ki ïohi ïa ka jingsynshar ka NPP kaba la trei bha ïa ka jylla.
“Lada ngim ïoh ban thaw hi marwei ïa ka Executive Committee ha kine ar tylli ki district council ngin sa ïatreilang bad ki seng saiñpyrthei kiba ïahap jingmut bad ka NPP,” u la ong.
Shuh shuh u la ïathuh haba la ïoh ïa ka jingkheiñ na ki nongkitkam ki don ki konstitwensi ba ka NPP ka ïakhun bad ka VPP, don ki konstitwensi ba ka ïakhun bad ka UDP, don ki konstitwensi ba ka ïakhun bad ka Congress bad ka HSPDP.
U la ong ban rai ban thaw ïa ka EC ha kine ar tylli ki district council yn sa ïashai ynda la dep ñiew ïa ki vote.
