Shillong, Rymphang 23
Ka jingkynrei jong ki kam tuh kam thiem kam long thymmai shuh bad ym tang ki ïing ki sem hynrei wat ki jaka shipai ruh kim shngaiñ shuh.
Katkum ka khubor ba la ïoh na ki pulit la ong ba ki bor pynïaid jong ka PMC Hq., 101 Area, Officers’ Mess, Shillong ki la ai ka jingujor ba ha ka 17 tarik mynta u bnai, ki runar bym lah ban ithuh ki la prong tuh sha ka quarter jong ki ophisar kaba don ha 101 Area, Upper Shillong bad ban rah tuh ar tylli ki Jaguar Basin Mixer bad kawei ka Jaguar Jet Spray kiba shongdor kumba T.11,525/-.
Ha kawei pat ka khubor shah tuh, ka Prentina Marak ka la ujor sha ki pulit ba ha ka 19 tarik mynta u bnai ha ka por kumba 6 baje mynstep, ka la ïoh jingtip ba ki runar bym lah ban ithuh, ki la prong tuh sha ka jaka tylliat khaw jong ka, kaba don ha ka shnong Chandigre ha West Garo Hills bad ban tuh haduh 243 byrni u khaw uba la khia 50 kilo shi byrni, uba la shongdor haduh T.4,14,300/-.
