Baghmara, Rymphang 23
Ka Garoland State Movement Committee (GSMC – Ashuragre) bad ka FKJGP – Chokpot Regional Unit, ha ryngkat ki nongshong shnong jong ka thaiñ ki la ujor sha ki pulit kumjuh sha u Deputy Commissioner ka South Garo Hills (SGH) ha ka 19 tarik mynta u bnai halor ka jingpynslem ban pyndep ïa ka skhim JJM kaba lah ban ai jingmyntoi ïa kumba 10 tylli ki shnong hapoh ka Sankinigre jong ka distrik.
Ïa kane ka jingujor la ujor pyrshah ïa ka kontraktor, ka Morjina Marak bad u kurim jong ka, u Chenang Sangma hadien ba la pynlong ïa ki jingtohkit da ka CSO hadien ka jingbym ïahap jong ka RTI bad ka DPR. Ha ka jingshisha, ka CSO ka la kynnoh ba u Chenang u la pyni ïalade kum u President ka seng samla jong ka NPP ha East Garo Hills bad pyndonkam ïa ka bor jong u.
Kane ka projek pynheh kaba don ïa ka jingbuh jingkheiñ kaba T. 3,48, 47, 620 bad ka lah ban wanrah jingmyntoi ïa ka shnong Ala Nokatgre, Ala Rongpakgre, Alagre, Anigre, Asinanggre, Ashugre, Debaigre, Deku Bazar, Gadak Nawepilgre, Ganchi Kalak, Kama Anigre, Nachi Adugre bad Rimrangpara Adingre hapoh Chokpot C&RD Block. Kane ka projek ka hap hapoh ka jingpynheh jong ka Alagre Songgital Combined WSS.
Katkum ka jinglap jong ka RTI, la thmu ban sdang ïa kane ka projek ha ka 16 tarik u Naitung, 2021 ha kaba ka tarik ban pyndep kan long 1 snem naduh ka tarik ba la ai jingmynjur. Hynrei katkum ka jinglap jong ka CSO halor ka jingpyntrei ïa ka projek ban pynbiang umdih sha kine ki shnong, kam pat shym la sdang. Kumjuh, ka kontraktor bad u kurim jong ka (uba dei ban khmih ïa ka projek) ki la kyntait wat ban ithuh ïa ki nongshong shnong halor katei ka kam.
Ki CSO ki la kynnoh ba ka jingtreikam kam pat sdang haba ïadei bad katei ka projek watla ka kontraktor ka dang lah ban sei ïa ka pisa kaba T.1.86 klur. Shuh shuh ha ka ‘website’ jong ka JJM, ka jingdon jong ki FHTC baroh kiba la dep buh ka pyni 417 tylli ki jingpynïasoh pyrshah ïa ka 399 ba la tyrwa watla ka pyni ruh tang 2% na ka projek kaba la dep – ka jingpynkylla dur ba harukom.
“Kane ka long kum ka jingbamsap namar ba ka kontraktor ka dei ban pyndep katkum ka aiñ ïa ka projek hadien ba la pyndonkam ïa ka pisa kaba la thmu na ka bynta ki paidbah bad ka jingsuk jong ki. Ngi la kyrpad ïa ki la bunsien hynrei khlem jingmyntoi. Ngi dawa ba ïa ki shi kurim yn pynngat hapoh ki kyndon aiñ kiba biang bad ban leh eiei ban pyndep noh kloi ïa ka projek. Ka kam runar jong ki ka la ktah ïa ki paidbah,” la pynpaw ki CSO ha ka ejahar.
