Mawkyrwat, Rymphang 24
Ka Voice of the People Party (VPP) ha ka sien ba nyngkong eh ka la ïoh ïa ka jingjop ha ka ilekshon MDC na Mawkyrwat konstitwensi lyngba u Bah Pynkhrawboklin Kharjahrin hadien ba u la tam da 3548 vote ïa u kyrtong uba wan ba ar kata u Bah Jeslanroy Nongsiej na ka UDP.
U Bah Pynkhrawboklin u la ïoh haduh 12034 vote katba u Bah Jeslanroy Nongsiej u ïoh 8486 vote, Bah Carnes Sohshang na ka NPP u la ïoh 8361 vote bad bud sa u Bah Medalsing Lyngdoh na ka Congress 2284 vote.
Haba kren sha ki lad pathai khubor, u Bah Pynkhrawboklin Kharjahrin u la ong, ka jingjop jong u ka dei ka jingjop jong ki paidbah bad u la pynpaw ruh ïa jingsngewkmen ba kumba u paidbah u la angnud ïa ka jingkylla mynta ka la urlong ban ïoh ïa ka synshar kaba khuid kaba suba ka synshar-khadar ka ban long jingkyrkhu ïa baroh lang.
U la ong ruh, “Kumba u paidbah u la pynjop donburom, ngan leit sha District Council ban pynkhlaiñ shuh shuh ïa ki aiñ kiba la don lypa bad ban pynskhem shuh shuh ïa ka jinglong trai ïa ka khyndew ka shyiap, ka khaïi ka pateng bad kiwei-kiwei.”
Haba phai pat sha ka Langrin konstitwensi, u Bah Pius Marweiñ na ka UDP u la ïoh biang ïa ka jingjop hadien ba u la ïoh haduh 13325 vote bad tam da 2899 vote ïa u Bah Mandilos Nongbri kyrtong ka NPP. Haba ai jingkren u Bah Pius Marweiñ u la ai khublei kyrpang ïa ki nongkyrshan ka UDP jong ka Langrin konstitwensi kiba la kyrshan bor bah ban pynjop biang ïa u ha kane ka kynti ba mynta kumjuh u la ai khublei ruh ïa kito ki bym shym la kyrshan.
U Bah Pius u khot bad wer ïa ki paidbah ka Langrin konstitwensi ba kin ai ïa ka jingïatreilang na ka bynta ban wanrah ïa ka roi ka par hapoh ka konstitwensi da kaba bynrap ruh un long u nongmihkhmat jong baroh ki paidbah ka konstitwensi.
