Shillong, Rymphang 24
Napdeng 19 ngut ki MDC ka Khasi Hills Autonomous District Council (KHADC) kiba la ïakhun biang ha kane ka ilekshon ba mynta, tang 4 ngut ki la ïoh biang ïa ka jingjop katba 15 ngut kiwei pat ki la liem lyndang.
Na kine 15 ngut kiba la mad noh ïa ka jingshah rem ha ka sngi ba la ñiew ïa ki vote ha ka Lah Sngi U Blei ki kynthup ïa u Chief Executive Member (CEM) Bah Pynïaid Sing Syiem, Chairman Bah Lamphrang Blah bad Deputy CEM barim Bah PN Syiem.
Katba saw ngut ki MDC kiba la ïoh biang ïa ka jingjop ki kynthup ïa ka Kong Grace Mary Kharpuri jong ka NPP, kaba la jop haduh saw samoi na Nongshken konstitwensi, u Bah Alvin K Sawkmie jong ka NPP na Mawsynram, u CEM barim bad MDC ka UDP Sohra Bah Titosstarwell Chyne bad u MLA/MDC ka UDP na Ranikor Bah Pius Marweiñ.
Ka Kong Grace ka la jop da 3313 vote ïa u kyrtong ka VPP ba wan ba-ar Bah Manbhalang Thabah, u Bah Alvin Sawkmie u la jop da 5035 vote ïa u kyrtong ka VPP ba wan ba-ar Bah Ruseivan Shangpliang, u Bah Titosstar Well Chyne u la jop da 863 vote ïa u kyrtong ka VPP Bah John W Thabah bad u Bah Pius u la jop da 2899 ïa u kyrtong ka NPP Bah Mandilost Nongbri.
Ha kane ka sngi ñiew vote, la sakhi ba ki la don sa saw ngut kiwei pat ki MDC ba la jop teng, kiba la wan phai biang mynta kum ki MDC ki kynthup ïa ka Kong Rona Khymdeit (NPP) na Nongpoh, Bah Ricky Shullai (IND) na Laban-Mawprem, Bah Srally Rashir (HSPDP) na Mawshynrut bad Bah Equator L Nongrang (UDP) na Mairang Konstitwensi.
