Shillong, Rymphang 25
U Nongïalam ka UDP uba dei ruh Myntri Sorkar, Bah Kyrmen Shylla u la ong ba ki paidbah ha Jaiñtia Hills ki dei ban ïoh ka lad ba laitluid ban shim rai halor ka jingwan ka lynti rel khlem ka jingtuklar jong kiba na shabar.
“Nga kwah ban ïohi ba kam dei ban don ka jingwan tuklar nangno-nangno ruh, ai ba ki paidbah ka Ri-lum Jaiñtia kin rai halor ka lynti rel”, ong u Bah Kyrmen haba ïakren bad ki lad pathai khubor halor ka jingkylli ïa ka jingtyrwa bathymmai ban pynïasoh lynti rel ba 180 Km na Chaparmukh Junction, Assam sha Jowai, Meghalaya.
Wat la ka jingïasyllok ka dang ïaid shakhmat, une u MLA na Khliehriat u la ong ba ka long kaba donkam ban pynlong ïa ki jingïalang kiba heh ha kaba baroh, khamtam ki trai shnong na kitei ki jaka ki lah ban ïashimbynta bad shim rai halor kane ka jingtyrwa.
“Lada jia ba ki kwah ban wanrah lynti rel sha Jowai, ai ba ki paidbah ka Jowai kin rai bad lada ka ïaid lyngba ka thaiñ jong nga, ai ba ki briew jong nga kin rai, la kin pdiang ne em? Ym dei ban don ka jingwan tuklar jong kiba na bar. Kane ka dei kaba nga kwah ban ong,” ong u Bah Kyrmen.
Haba kylli la ka don kano-kano ka jingtuklar na kino-kino ki liang, u Myntri u la ong ba um lah ban pynthikna la ka don ne em namar kam shym la poi sha ka jingtip jong u, hynrei u la ong ba lada don eiei, kim dei ban tuklar hynrei ailad ïa ki trai shnong ba kin rai namar ki tip kham bha ïa ka kamai jakpoh bad kumno ki long.
“Ngi dei kiei ban leit tare na ka pliang ja kiwei? Ka biang ban kyrshan bad khlem pep ngin kmen eh ban ïoh ïa ka jingkyrshan jong kiwei namar ngi hap ban shim khia ïa la ki briew lajong”, u la ong.
U Bah Kyrmen u la ong ruh ba u la raikut ban ïeng ryngkat bad ki paidbah bad ka rai jong ki halor ka lynti rel.
“Kum u nongmihkhmat ka thaiñ, ngi hap ban kren ïa la ki jong ki briew. Lada ki ong em, ka mut ba ngin ïeng lang pyrshah ïa ka Sorkar lada ki pyrshang ban wanrah ïa ka lynti rel. Hynrei lada ki paidbah ki ong hooid, ngin ïeng ryngkat bad ki paidbah. Nga don ryngkat bad u paidbah la ka dei hooid ne em, ngan don ryngkat beit bad ki”, la kren skhem u Bah Kyrmen Shylla.
