Shillong, Rymphang 25
U National General Secretary ka National People’s Party (NPP), Bah Sniawbhalang Dhar, u la ong ba ka jingïoh vote lane ka ‘vote share’ jong ka Voice of the People Party (VPP) ka la hiar sha 3.71 lak katba ka jingïoh ‘vote’ ka NPP ka la kiew sha ka 2.80 lak ha ka ilekshon sha ar tylli ki Autonomous District Council (KHADC & JHADC) kaba la kut noh ha ka Lah Sngi U Blei.
Haba kren bad ki lad pathai khubor ha ka Sngi Ba-ar, u Bah Dhar uba dei ruh Symbud Myntri Rangbah ka Jylla, u la ong ba ka VPP ka la ïoh tang kumba 3.71 lak ‘vote’ ha ka ilekshon ADC na ka 5.70 lak eiei ka ‘vote’ ba ka ïoh ha ka ilekshon MP Lok Sabha ha u snem 2024.
“Kane ka mut ba ka ‘vote’ jong ka VPP ka la hiar tang hapoh ka 8-9 bnai bad hapoh u 2028, kan sa nang hiar sha ka 80%, phim lah ban tip bad ngin trei shitom ba kan long kumta”, u la ong.
Une u Nongïalam ka NPP u la kam ruh ba ka seng ka la nang leh bha ha ka ilekshon ADC ba dang shu dep ha kaba la lah ban pynkiew ïa ka bhah ha ka jingïoh ‘vote’ sha ka 2.80 lak.
“Ngi la leh bha ha kaba ïadei bad ka jingïoh ïa ki ‘vote’, ka VPP mynta ha kane ka ilekshon MDC ka ïoh tang kumba 3.71 lak, katba ka NPP ka ïoh 2.80 lak, bad ka jingïapher ka long tang 85,000 ‘vote’ haba ïanujor bad jingïapher ha ka ilekshon MP kaba long haduh ka 3 lak tam ki ‘vote’. Kane ka la pyni ba ngi la kiew kum ka seng NPP bad kum ka kynhun hapoh ka Sorkar MDA”, la ong u Bah Dhar.
Ha kaba ïadei bad ka jingshah kynnoh ha u President ka VPP ba la don ka jingpyni ksah (bor met) kaba pynlong ïa ka VPP ban ïoh tang 8 ngut ki MDC ha ka jaka ban ïoh haduh ban thaw ïa ka executive committee ha JHADC. Na ka liang u Nongïalam ka NPP u la ong, “Namar ba ngi ïoh 13 ‘seat’ ki mut ba ngi pyndonkam da ka ksah, lada phi ong ba pyndonkam da ka ksah lei, ka nuksa kaba rit, ki VPP keiñ kiba shoh bad thombor ïa ka ïing u rangbah shnong ka Narwan bad hangto keiñ la ïohi ba ki pyndonkam da ka bor ksah. Ha Khasi Hills ki jop 17 ‘seat’ ngi khlem ong ïa ki ba ki pyndonkam da ka ksah, hynrei haba ngi jop 13 ki ong ba pyndonkam da ka bor ksah ka long kaba bakla, ngi burom ïa rai ki paidbah”.
Ha kawei ka liang u Bah Dhar u la ai khublei ïa ki paidbah ha Jaiñtia Hills ba ki don ka jingngeit bad jingshaniah kaba pynlong ïa ka seng ban jop bun paid eh ha JHADC, kumjuh u la ai khublei ïa ki paidbah jong ka Khasi Hills kiba la ai ka jingkyrshan.
“Ngi la nang kham leh bha shuh-shuh da 50-60%. Ngi burom ruh ïa ka rai jong ki paidbah ka Khasi Hills ba ngi ïoh tang 4 ‘seat'”, u la ong.
U Bah Dhar u la pynthikna ruh ba ka kynhun jong ka Sorkar MDA kam don jingthmu ban thaw ïa ka EC bathymmai ha KHADC namar ki paidbah ki la ai ïa ka rai kaba shai sha ka VPP, hynrei u la bynrap ruh ba lada kim lah ban pynïaid shakhmat ïa ki kam yn sa ïapeit hadien katto-katne snem.
Haba pynpaw ba ka VPP ka la kular shibun kiei-kiei ha ka por ïalap ilekshon, u Bah Dhar u la ong, “Nga khmih lynti ba kin pyndep ïa la ki jong ki jingkular khnang ba ki paidbah kin kmen bad lada kim lah, ki paidbah kin sngewsih. Ki paidbah kin ai por ïa ki lai snem”.
Ha kaba ïadei bad ka JHADC, u Nongïalam ka NPP u la kular ba ka EC bathymmai ban ïalam da ka NPP kan leh eiei halor ka jingkyrduh pisa jong ka JHADC.
Ka NPP kan thaw ïa ka executive committee bathymmai ha Jaiñtia Hills Autonomous District Council (JHADC) hadien ba ka la jop 13 ngut ki MDC bad yn kyrshan ruh da 3 ngut ki MDC ka UDP, 2 ngut ki kyrtong shimet. Katba ha KHADC kan hap ban shong ha ka Liang Pyrshah namar ka ïoh tang 4 ngut ki MDC na 29 konstitwensi.
