Shillong, Rymphang 25
U Symbud Myntri Rangbah ka Jylla ba khmih ïa ka tnat Pynroi Sor, Bah Sniawbhalang Dhar, u la ong ba ka Sorkar kam shym la pynjlan kai ïa ka por hynrei ka la kut jingmut hok ban pyndep noh ïa ka kam ban pynkynriah ïa ki 342 tylli longïing na Them Metor, Them Ïew Mawlong kham kloi katba lah.
Haba ïakren bad ki lad pathai khubor ha ka Sngi Ba-ar, u Symbud Myntri Rangbah u la ong ba ka Sorkar kam shym la shim sting ïa kane ka kam namar ba ka dei ka kam kaba la sahteng mynta la bun-bun snem.
“Ngim shym la pynjlan ïa ka por. Namar ba ka dei ka kam kaba la sahteng la bun-bun snem bad ha shwa ba ngin shim ïa ka rai kaba khatduh, ngi donkam ïa ka por ban pynbeit ha ka lynti kaba dei namar lada ka tuklar ka kashari, kan nang kham jynjar shuh-shuh. Kumta, ngi la shim khia ïa kane ka kam ban pynthikna ba ngin lah pynbeit shisyndon ïa ka”, u la ong.
U la bynrap shuh shuh ba ka Sorkar kam kwah ban shim rai kyrkieh ha kaba ïadei bad kane ka kam wat la ka la shim por lypa.
“Wat la ngi la shimpor, hynrei ka dei na ka bynta ban pynbeit shisyndon ïa ka bad kane ka dei kaba ngi kwah. Kam dei satia ba ngi sheptieng ïano-ïano, hynrei ka dei namar ba ngim lah ban shu bret ïa ki kumto. Ngim shym ïada ïano-ïano ruh. Ka Sorkar ka la shim khia bad buh hakhmat eh ïa kane ka kam”, la ong u Bah Dhar.
Haba pyntip ïa ka jingïaid ka kam ban pynkynriah ïa ki briew na Them Metor, Symbud Myntri Rangbah u la ong ba kane ka kam ka la don ha ka khep sa tang ban shu pyndep beit noh.
Halor ka jingtyrwa ban pan ïa ka jaka shipai na ka bynta ban pynkynriah ïa ki longïing, u Bah Dhar u la ong ba ka jingïakren ka dang ïaid bad ka Defence Ministry ka Sorkar India.
“Namar kata, to ngin ïa ap namar ka don jingïadei bad ka Sorkar Pdeng”, la ong u Myntri.
