Shillong, Rymphang 25
U Chief Executive Member (CEM) barim ka Khasi Hills Autonomous District Council (KHADC) Bah Titosstarwell Chyne uba la jop biang ïa ka ilekshon MDC na ka UDP na Sohra Konstitwensi u la ong ba yn sa tip ïa ka jingtreikam jong ki MDC ka Voice of the People Party (VPP) kiba dang jop thymmai ynda la long dorbar.
U Bah Titosstarwell u la ong wat la ki MDC ka VPP ki dei kiba dang jop thymmai lut baroh, um pat lah ban ong eiei hynrei un sa tip ynda ki la wanrah ïa ka rukom treikam kiba thymmai ha dorbar.
U la ïathuh ba ki MDC ka UDP kin sa shong jingïalang lashai ka sngi ka 26 tarik mynta u bnai ha Shillong.
U la pyntip ba ka UDP bad kiwei ki seng saiñpyrthei ki lah ban shong ha liang pyrshah namar ka VPP kaba jop bun ki MDC ka la lah ban synshar marwei ïa ka KHADC hynrei lada don ka jingshah khot kin sa ïakren.
Shuh shuh, u la pynpaw ba ka jingjop biang ka jong u ha kane ka ilekshon MDC na ka UDP ka pyni ba ki paidbah ki long kiba stad haba ki jied biang ïa u.
U la ong biang kumba ki paidbah ki shaniah un ïai don ryngkat bad ki bad ban pynkhlaiñ ïa ka UDP.
U Bah Titosstarwell u la jop ïa u kyrtong ka VPP, Bah John Thabah na Sohra Konstitwensi da 863 vote.
Wat la ka UDP kan shong jingïalang lashai ka sngi hynrei la sngewthuh ba ka UDP, NPP, HSPDP bad MDC shimet kin hap ban shong ha ka liang pyrshah namar ka VPP ka la jop marwei haduh 17 ngut ki MDC kaba mut ba ka la lah ban synshar hi ïa ka KHADC.
