Shillong, Rymphang 25
U Myntri ba khmih ïa ka tnat Pule-Puthi ha ka Jylla, Rakkam A Sangma, u la ong ba ka skulbah University of Science and Technology Meghalaya (USTM) ka don ha Meghalaya ba la mynjur ruh katkum ka aiñ jong ka Ïingdorbar Thaw Aiñ ka Jylla, bad ka jingkylli kam mih ban don ka jingtohkit ïa u Chancellor katei ka skulbah, u Mahbubul Hoque.
“Ka jingkylli ban thung ïa ka kynhun tohkit halor ka jingshah kem u Chancellor ka USTM kam long kaba ïahap namar ba kim shym la ïoh kano-kano ka jingujor da ka jingthoh”, la ong u Rakkam haba ïakren bad ki lad pathai khubor ha ka Sngi Ba-ar.
U Myntri u la ong ba ka jingshah kem kam don jingïadei eiei ruh em bad ka USTM katkum ki khubor kiba la mih, hynrei ka dei na kiwei pat ki daw kiba ïadei bad ka Jylla Assam.
“Ngam don eiei ban ong ne don kino-kino ki jingtip halor kane ka sobjek”, u la ong.
U Rakkam u la ong ba ïa ka USTM la khmih hapoh jong ka Private Universities Rules jong ka Sorkar Meghalaya ïa kaba la wanrah bad ïoh jingmynjur na ka Ïingdorbar Thaw Aiñ ban seng ïa ka skulbah.
Lah ban kdew ba u Chancellor ka USTM, Mahbubul Hoque u la shah kem ha ka 22 tarik Rymphang ha ki pulit Assam bad ka Special Task Force (STF) ha kaba ïadei bad ka jingujor mukotduma ha Sribhumi, Assam hadien ba ka la mih ka jingkynnoh ba ka la don ka jingleh bym khuid ïa ka eksamin ha ka skul kaba la pynïaid da ka ERD Foundation kaba u Hoque u la long kum Chairman.
