Shillong, Rymphang 26
Ka Kynhun Myntri jong ka Sorkar MDA-II ka la mynjur ïa ka Meghalaya Urban Parking Policy, 2025, ban pynbeit ïa ka ïaid ka ïeng bad ki jaka ïeng jong ki kali ha ki surok, bad lyngba kane ka polisi kiba pynïeng kali ha surok kin hap ban siew.
Haba pyntip ïa kane ha ka Sngi Balang, u Myntri Rangbah ka Jylla, Conrad K Sangma u la ong ba ha kane ka polisi ki don lai bynta, kawei ka bynta ka dei ha ki jaka ka Municipal ba la don lypa ki jaka ïeng kali ïa kiba yn ym ktah bad ki ban neh kumba ju long, kumjuh jong ka tnat Pynroi Sor ki jaka ïeng kali kin long kumba ju long baroh shikatta.
“Kane ka polisi ka long na ka bynta ka jingpynïeng kali ha surok. Mynta ym don ka jingshim pisa bai ïeng kali ha surok, ym don ba peit ruh ïa ki, kaba ki pulit, ka tnat Pynroi Sor bad ki bor pynïaid shnong ki la ju ïakynduh jingeh bad pynpaw ka jingsngew khia”, u la ong.
U la ong ba lyngba kane ka polisi yn kynthup lang ïa ki nongshong shnong ha ki dong bad ki shnong bapher-bapher ban pynthikna ba kan treikam shisha. U la ong ba kane ka long ban pynbeit ïa ka jingpynïeng kali ha surok bad yn wanrah ha kata ka rukom ba kiba pynïeng kali kin hap ban siew, bad yn kdew ruh ïa ki jaka ba lah ban buh kali bad ki bym lah ban buh.
“Ka bynta kaba lai ka long ba ki don bun ki jaka kiba dei jong ki shnong, ki kynhun kiba kloi ban treilang bad ka Sorkar da ka Public Private Partnership (PPP) ban buh ïa ki jaka ïeng kali ha kita ki jaka. Lada don ki kynhun, ki dorbar shnong ki don ka khyndew bad ki kwah ban pynkylla ïa kata ka jaka sha ka jaka ïeng kali, ka Sorkar kan kyrshan pisa ban shna ïa ka jaka ïeng kali bad kan trei ryngkat-ryngkat ban pynmih bun tylli ki jaka pynïeng kali”, la ong u Myntri Rangbah.
U la ong ba kane ka polisi ka dei kaba la dep ban mynjur ha u snem ba la dep da ka Kynhun Myntri tang na ka bynta ka sor Shillong, hynrei mynta la pynïar ïa kane ka polisi ba kan treikam ha baroh ki jaka sor hapoh ka Jylla.
