Shillong, Rymphang 26
Ka Kong Grace Mary Kharpuri, kaba la ïoh biang ka jingjop ha kane ka ilekshon MDC na Nongshken Konstitwensi ka la shah jied kum ka nongïalam ka Parliamentary Party (PP) jong ka NPP ha KHADC.
Ha ka Sngi Balang, ka NPP hapoh ka jingïalam jong u Bah Prestone Tynsong, President ka NPP Meghalaya ka la ïoh ban ïakynduh kyrpang bad saw ngut ki MDC ka seng kiba dang shu ïoh jingjop ha kane ka ilekshon kaba dang shu dep.
Ha ka kyrwoh khubor ba la pyllait, la ong ba ha kane ka jingïakynduh bad da ka ïamynjur lang jong ki Nongïalam bad kumjuh na ki MDC ba dang shu jop, la jied ïa ka Kong Grace Mary Kharpuri kum ka Nongïalam jong ka Parliamentary Party ka NPP hapoh ka Khasi Hills Autonomous District Council (KHADC).
Ha kane ka sngi, nalor ki MDC ka NPP, ki Nongïalam ka seng ki la ïoh ban kynduh kyrpang ruh ïa u MDC ka HSPDP bad ruh u MDC shimet, ha kaba kine ruh da kawei ka sur ki la ïarai ban ïatreilang hapoh ka jingïalam jong ka Kong Grace hapoh ka KHADC.
