Shillong, Rymphang 26
Ka Sorkar Jylla ka la pynthikna ba ka jingthmu ban shna ïa ka lynti rel na Byrnihat sha Shillong kan ym urlong shuh namar ka jingbym ïoh jingmynjur na kiba bun balang, bad ba ka Sorkar Pdeng ka la phah pynphai noh ïa ka pisa ba la dep ai sha ka Jylla na ka bynta ban shna ïa ka lynti rel.
Haba kren bad ki lad pathai khubor ha ka Sngi Balang, u Myntri Rangbah ka Jylla, Conrad K Sangma u la ïathuh ba ka Sorkar ka la ïoh ïa ka shithi na ka Sorkar Pdeng kaba la phah ban pynphai noh ïa ka pisa ba la ai na ka bynta ban shna ïa ka lynti rel Byrnihat-Shillong.
“Ngin ïaid da ka jingkyrshan lang na ki paidbah halor kane ka kam namar la thmu ban leh na ka bynta ki paidbah na ka bynta ka roi ka kiew, ïa kaba ngi kyrmen ba ki paidbah ruh kin sngewthuh katba ngi dang ïaid shakhmat, khamtam ba ka jingpynïasoh ka long kaba donkam ha kane ka juk. Hooid, ki don katto-katne ki seng kiba la pynpaw ba ki ïeng pyrshah bad ngi burom ruh ïa kata”, u la ong.
U Myntri Rangbah u la ong ruh ba ka Sorkar India kan ym lah ban shu ap sah halor kane ka kam.
“Ngi la ïoh ïa ka shithi na ka Sorkar India, ba ngin pynphai noh ka pisa kaba la phah sha ngi na ka bynta ka lynti rel Byrnihat-Shillong. Kumba lah ban sngewthuh haba ngi kren mynta ruh, kane ka projek lah ban hap pyndam noh, ngam tharai shuh ba ka lynti rel kan long kaba shisha ha Shillong namar ka Sorkar India ka la phah pynphai noh ïa ka pisa”, u la ong.
Haba kylli, u Myntri Rangbah u la ïathuh ba ka pisa kaba la don lypa kaba dei na ka bynta ban siew ïa ka bai jaka bad kiwei ka long kumba T.200.70 klur.
Ha kaba ïadei bad ka lynti rel ha Jaiñtia Hills, u la ong ba lada ka don ka jingkyrshan na ka liang ki paidbah ka East Jaiñtia Hills, lehse ka Sorkar ka lah ban ïaid shakhmat bad kane ka projek ha katei ka thaiñ.
