Shillong, Rymphang 26
U General Secretary ka United Democratic Party (UDP), Dr Jemino Mawthoh, u la ong ba na ka liang ka seng ka pdiang ïa ka rai jong u paidbah kaba ki la ai ha kane ka ilekshon MDC kaba dang shu dep shen sha ka Khasi Hills Autonomous District Council (KHADC) bad kumjuh sha ka Jaiñtia Hills Autonomous District Council (JHADC).
Ha ka jingïakren bad ki nongthoh khubor, na ka liang u Dr. Jemino u la ong ba ka jingpynkhreh jong ka UDP ha kane ka ilekshon sha baroh ar tylli ki ADC ki la long kaba la biang bha naduh ka district level, constituency level bad haduh ki party unit.
U la ong ruh ba ka jinghiar ka UDP ha kane ka ilekshon ka dei na ka jinglong-jingman ha ka jylla ka jong ngi kiba bun bah kiba long pyrshah ïa ka sorkar bad ïa baroh kiba ïadonlang ha ka sorkar bad ka UDP ka dei ruh kawei ka ban shah kynthoh lang.
“Wat la na ka liang ka UDP ka don ha ka liang bad ka sorkar hynrei ngi kdew ïa ki jingbakla kiba ka sorkar ka leh bad ngi rah ïa ki mat kiba ktah ïa ka ri bad ka jaidbynriew,” u la ong. Naduh ka jingwan jong ka covid bad hadien ki la bun ki jingïakhih bad ka jingpyrshah ïa ka sorkar bad ka UDP ka dei kawei kaba la shah kynnoh ba ka ïadonlang bad ka sorkar.
Ha kaba ïadei bad ka jingïatreilang ha KHADC bad JHADC, ka VPP ka ïoh 17 seat marwei bad ka la lah ban ïalam ïa ka EC hynrei ha JHADC ka la ïoh tang 8 seat.
“Katkum ka jingsngew jong nga ba lada ki seng ‘riewlum ki wan ban ïatreilang kan bha shibun lada don ka lynti,” u la ong. U Dr. Jemino u la ong ruh haba peit sha ka jingdon jong ki MDC ha kine baroh ar tylli ki ADC ka ïapher, kumta ngi hap ban sngap ïa ka jingai jingmut jong ki nongïalam kiba na Jaiñtia Hills kaei kaba bha tam kaba ki sngew dei ban leh.
“Lada ngi don ha ka liang synshar ne liang pyrshah ruh ngi dei ban ai ka kti kadiang ka kti kamon ban trei ha ka ban pynbha shuh-shuh ïa kine ar tylli ki ADC namar ba ngi dei ban sngewthuh ba kine ki ADC ki dei ba donkam bad kum ka jaidbynriew ngi dei ban don ka jingïatylli,” u la ong.
U Dr. Jemino u la ong kumba u paidbah u la ai ka rai bad na ka liang ka seng ngi khmih lynti ba kiba ïalam ïa ka EC hapoh ka KHADC mynta ki dei ban trei bha kumba ki la kren, la khlei bad angnud ban wanrah ïa ka jingkylla bad ngi ruh ngi kyrmen ba kan long ha kta ka rukom .
U la ong ruh ba lada ki don ha ka liang pyrshah ne liang synshar ki dei ban ai ka jingïatrei lang ban pynkhlaiñ ïa ka khyrnit ba phra namar kane ka dei ka atiar bah ka ban ai ïa ka jingïada ïa ngi ïa ka jaidbynriew ban pynïaid beit pynïaid ryntih ïa ka riti ka dustur ban ïada ïa ka khyndew ka shyiap bad kiba bun ki kam kiba ka District Council ka la leh na ka bynta ki jaidbynriew ritpaid.
