Shillong, Rymphang 26
Ka Sorkar Jylla lyngba ka tnat District Council Affairs (DCA) ha ka 25 tarik u Rymphang ka la pynbna ba ka jingpynbam smai ïa ki MDC kiba dang shu shah jied thymmai jong ka KHADC kan long ha ka 27 tarik kata lashai ka sngi ha ka por 11 baje mynstep, katba ka jingjied ïa u Chairman ne u Shongknor ka KHADC kan long ha ka 28 tarik kata ha ka Sngi Thoh-dieng ha ka por 11 baje mynstep bad ka jingjied CEM kan long ha kajuh hi ka sngi ha ka por 2 baje nohphai sngi.
Kane ka dei ka kyrwoh ba la phah da u Commissioner and Secretary ka Sorkar Jylla, Bah Cyril V Diengdoh lyngba ka hukum na u Lat ka jylla u CH Vijayashankar. U Lat ka jylla u la bthah ha ka Deputy Commissioner jong ka East Khasi Hills ka Kong Rosetta Mary Kurbah ban pynïaid ïa ka jingïalang na ka bynta ka jingshim smai jong ki MDC bad ban jied ïa u Chairman jong ka KHADC, katba ïa ka jingjied CEM yn pynïaid da u Chairman u ban sa shah jied.
