Shillong, Rymphang 26
U National President ka National People’s Party (NPP) uba dei ruh u Myntri Rangbah ka Jylla, Conrad K Sangma u ong ba kum ka seng ka pdiang ïa ka rai ba ki paidbah ki la ai, hynrei ka seng kam shim sting ïa ka jingmih na ka ilekshon bad bynrap ba ka jingmih na ka ilekshon ha Khasi bad Jaiñtia Autonomous District Council kan ym ktah ïa ka ilekshon ha Garo Hills.
Haba kren bad ki lad pathai khubor ha ka Sngi Balang, u Conrad u la ong ba ka seng ka la khmih lynti ba kan leh bha ha ka ilekshon KHADC kumba ka la leh bha ha JHADC, hynrei lada ïanujor bad ka ilekshon MP ka NPP ka la leh bha namar ka jingkiew ka jingïoh ïa ki ‘vote’.
Haba kylli, u la ong ba ka NPP kam shim sting ïa kano-kano ka seng saiñpyrthei hynrei ka shim beit ba ki dei kiba hap ban ïakhun tyngeh.
“Nga la ong ïa kane sha baroh ba ngim dei ban shim sting, wat la phi ong ba ka Congress ka khlem jop tang iwei ruh, hynrei ngim lah ban shu kheiñ sting”, u la ong.
Haba kyrtiang dien sha ka ilekshon MP kaba la long ha u snem ba la dep, u Conrad u la ong ba kaba hap ban shim ka long na katei ka ilekshon ha kaba baroh 29 tylli ki konstitwensi ha Khasi Hills ka NPP ka khlem jop, hynrei ha kane ka kynti la ïoh ïa ka jingjop ha ki katto-katne ki konstitwensi.
“Ka jingïoh ‘vote’ jong ngi ka la kiew haba ïanujor bad shisnem mynshwa katba ka jingïoh ‘vote’ ka VPP ka la hiar. Ka shong ha kano ka rukom phi peit ïa kiei-kiei”, u la ong shuh shuh.
Haba kylli, u la ong ba ka jingsngew ba ka don ka jingpyrshah Sorkar ka dei kaba la shu kren namar ka dei ka bynta ha ka saiñ hima.
“Lada ka long kumta, ngin ym jop ha Nongpoh, Nongshken bad sha Jaiñtia Hills, hynrei ngi jop. Ki don bun kiei-kiei kiba donkam ban ïohi, bad barabor ngi shim ïa kaei kaba ïakren bad pynkut ba dei kata ka daw ba ka jia kumne, hynrei lada bishar bniah bha ki don bun ki mat bad ki jinglong-jingman ha kiba bun ki jaka”, la ong u Nongïalam ka NPP.
