Ampati, Rymphang 26
U nongtrei mon sngewbha ha ka imlang-sahlang, Greneth M. Sangma u la ujor ejahar ha Ampati Police Station, South West Garo Hills (SWGH) hadien ba uwei u briew, u la pyrthuh kum u doktor na Civil Hospital bad thok ïa ki paidbah ban ai kam bapher-bapher ha ki PHC (bapher-bapher) ha Ri-lum Garo.
U Sangma u la pynpaw ba hadien ka ejahar, ki la lap ruh ba une u doktor thok, ba la ithuh kum u Hirak Sangma, um dei u doktor hynrei um don ruh kano-kano ka jingïadei satia bad ka Ampati Civil Hospital.
“Ka jingtohkit jong ngi ka la pynpaw shuh-shuh ba une u briew u la leh ïa ki kam thok la slem bah, da kaba pyndonkam bakla ïa ki ‘riew lui-lui bad buh jingma ruh ïa ka imlang-sahlang. Ka long kaba donkam eh ba ngin pynsngewthuh shaphang kane ka mat bad ban shimkhia mardor ban pynngat ïa u nongleh kam sniew ha ka aiñ,” la pynpaw u Greneth.
U la pynsngew ba kane ka jingjia ka kdew ïa ka jingdonkam ba kyrkieh ban pynduh jait ïa ka bamsap da kaba bynrap ba ym lah pdiang satia ba ki briew kum une uba shah kynnoh ki lah ban pyndonkam bakla bad thok ïa ki briew khlem da shah pynshitom.
“Ngi dawa ba ki bor ba dei khmih kin shimkhia mardor bad pynngat ïa une uba shah kynnoh hapoh ki kyndon aiñ ba ïadei kumjuh ban kem mardor ïa u. Ngi dawa ba ki bor ba dei peit ban leh eiei mardor pyrshah ïa une u doktor thok uba la pyrthuh kum u doktor – ban thok ïa ki ‘riew lui-lui bad buh jingma ïa ka jingim jong ki,” u la bynrap.
