Shillong, Rymphang 26
U President ka Voice of the People Party, Bah Ardent Miller Basaiawmoit u la pyntip ba ka seng ka la jied ïa u MDC na Lyngkyrdem-Laitkroh Konstitwensi Bah Shemborlang Rynjah kum u Chief Executive Member (CEM) ba thymmai ka Khasi Hills Autonomous District Council (KHADC).
Haba pyntip sha ki lad pathai khubor ha ka 26 tarik Rymphang 2025, u Bah Ardent u la ïathuh ba ka seng ka la shim ïa ka rai ban thung 8 ngut ki dkhot jong ka Executive Committee kynthup ïa u Chairman bad u Deputy Chairman ka KHADC.
U la ïathuh ba ka seng ka la jied ïa u Bah Strongpillar Kharjana, MDC na Mawkhar-Pynthorumkhrah kum u Chairman bad ïa u Bah Kynjohlang Rangtong MDC na Mawhati kum u Deputy Chairman. Katba ki dkhot hapoh Executive Committee (EC) ki long u Bah Powell Sohkhlet, Bah Seiborlang Warbah, Bah Isynei Hinge, Bah Pynkhraw Kharjahrin, Kong Aibandaplin L Nonglait, Kong Deiti Majaw bad Bah Winston Tony Lyngdoh.
U la ong ba ka daw ba pynlong ïa ka VPP ban thung khyndiat ngut ki dkhot hapoh ka Executive Committee ka long ban nym pynsyrwa kai ïa ka pisa u paidbah.
U Bah Ardent u la ong ruh ba ka seng kan nym kular kai ïa ki paidbah hynrei kan leh ruh da ka kam kumba u paidbah u la ai ka jingkyrshan.
Shuh shuh, u la ong ruh ba ki ar tylli ki District Council kim dei kiba biang ha ka jingpynmih pisa, kumta kane ka rai kan ïarap shibun ban pyntikna ba ka council kan ïaid khlem da ïakynduh jingeh ha ka kam pisa tyngka.
Haba kylli, ka seng kan leh kumno ïa ki aiñ kiba la thaw da ka EC barim, u Bah Ardent u la jubab ba ka jingleit jong ki shapoh District Council ka don la ka thong ban pynkhuid bad pynbeit ryntih ïa ka rukom treikam bad ban pynbha pat ïa kiba bun ki kam kiba ka EC barim ka la leh, kiba ktah ïa ka rukom treikam ka council.
Haba ïadei pat bad ka jingjia ha shnong Narwan, u Bah Ardent u la ong ba ka dei ka jingbitar jong u paidbah haba ki tip ba uta uba ki shaniah u dei pynban u nongshet kylla.
U la ong ba ka seng ka pynrem ïa kito kiba leit kawang maw ban pynjot ïa ki ïing ki sem bad kan nym pynshlur ïa kiba shim ïa ka aiñ ha lade wat la ki dei ki briew jong ka seng ruh.
Kum ban shu pynkynmaw, ki seng saiñpyrthei kiba la synshar ha KHADC ki ju jied beit 11 ngut ban long ki Executive Member ha ka Executive Committee hynrei ha kane ka EC ban synshar da ka VPP ka la thung tang 8 ngut ki EM.
