Shillong, Rymphang 26
U President ka Hynñiewtrep Youth Council (HYC) Sengkmie Bah Roykupar Synrem u la kyntu ïa u Bah Kyrmen Shylla uba dei u Myntri ka Sorkar Jylla ba um dei ban pynïapher jaidbynriew tang namar ka jingkwah ban poi ka lynti rel sha Rilum Jaiñtia.
Haba ïakren bad ki nongthoh khubor, u Bah Roykupar u la ong ba ka mat kaba ïadei bad ka jingrung kyrthep ki bar jylla shapoh ka jylla ka dei kaba hap shim jingkitkhlieh da baroh u dkhot ka jaidbynriew jong ka bri u hynñiewtrep namar lada u rung na rilum Jaiñtia, u bar jylla u lah ban leit sah sha kiwei ki thaiñ jong ka Jaiñtia.
Shuh shuh, u Bah Roykupar u la ong ba wat kheiñ kiba nabar ïa ki paradoh parasnam lym kumta wat u ‘Uranium’ la dep tih lada ym shah ban tuklar na ki dkhot jong ka jaidbynriew.
U la kyntu ïa ka Sorkar Jylla ba ka dei ban pynkhlaiñ ïa ki aiñ ban ïada ïa ka jingwan ki bar jylla namar um kwah ba ka jaidbynriew ba tang khyndiat ngut ban shah tyllep ha kiwei ki jaidbynriew.
U la ong ba ka jingwan ka lynti rel kan wanrah jingma ïa ka jaidbynriew rit paid kaba don tang 16 lak ngut kaba dang bun shah ki nongtrei ka Indian Railway.
“Ngi khlem pyrshah ïa ka kam pynroi hynrei ngim kwah ban ïapeiñ ïa ka khyndew ka shyiap bad duh noh ïa ka synshar-khadar, lada la jyllei ki briew kiba nabar ban wan sha ka jylla jong ngi,” u la ong.
