Shillong, Rymphang 26
Ka Jaiñtia Student Union (JSU) Sengkmie ka la kren shai sha ka Sorkar Pdeng bad ka Northeast Frontier Railway (NFR) ba kim dei ban wanrah lynti rel hapoh Rilum Jaiñtia katba kim pat lah ban wanrah ïa ki aiñ kiba khlaiñ ban ïada ïa ka jingwan rung kyrthep ki briew nabar.
Kane ka jingpyrshah ka JSU ka la wan hadien ka jingmih khubor ba ka NFR ka thmu ban sorjamin ïa ka lynti rel na Bhoksong, Rajagoan, Baithalangso, Jengkha, kherani bad Umrangso ka ban pynïasoh shaduh Jowai.
Ha ka kyrwoh khubor ba la pyllait na u General Secretary ka JSU Sengkmie u samla Neilkee Mukhim u la ong, na ka liang ka seng ka la kyntu ruh ïa ka JHADC ba kam dei satia ban ai No Objection Certificate (NOC) sha ka NFR na ka bynta ka lynti rel katba ka Sorkar kam pat lah ban pyntreikam ïa ka Inner Line Permit (ILP).
Ka Jaiñtia Student Union ka la ai jingmut sha ka Sorkar ba ha ka jaka ka lynti rel ai noh da ki medical college, engineering college bad kiwei kiwei ki jingdonkam.
