Nongstoiñ, Rymphang 27
Ha ka 27 tarik mynta u bnai ka Federation of Khasi Jaiñtia & Garo People (FKJGP) Ri Muliang Circle, kala leit ban ujor bad aiti ïa ka jingthoh sha u Deputy Commissioner ka West Khasi Hills halor ka jingshna pynheh surok ka Assam na Komphaduli kaba thmu ban kiew sha Langpih.
Katkum ka jingthoh ba la aiti sha u DC, ka FKJGP kala pan ruh ïa ka jingshai ba katei ka jingpynheh surok jong ka Assam ka dei kaba la ïatip lang ne em na ki bor Sorkar ka Meghalaya katkum ba la kdew ka ‘status quo’.
Shuh shuh na ka liang ka FKJGP kala buh ruh ïa ka jingkylli ba hato kane ka jingïai wanrah ka Assam ïa ki kam pynroi ha ka thaiñ Langpih ka ktah ne em ïa ka mat ïapynbeit pud hapdeng ka Meghalaya bad Assam, namar ki don bun tylli ki shnong Khasi bad Garo ki bym kwah ban hap ha Assam hynrei ki don sha shiliang jong kane ka surok ba la pyntrei da ka Sorkar Assam.
U President ka FKJGP Ri Muliang Circle u Bah Serbilin Lyngdoh u la ong, ka jingïapynbeit pud ka dang ïaid shakhmat hapdeng ki ar jylla, kumta kum ka seng ka sngew pyrshah jur lada ka Sorkar Assam ka ïaid khlem ka jingïatip lang bad ka Sorkar Meghalaya namar ka lah ban wanrah ka jingthut bad kulmar hapdeng ki nongshong shnong.
U la ong ruh ba na ka liang ka seng ba kano kano ka kam pynroi lane ka projek ïa kaba ka Assam ka pyntrei ha katei ka thaiñ lada kam don jingktah ïa ka mat ïa pynbeit pud ka Assam bad ka Meghalaya, ka mut ka seng kan nym tuklar ïa kata hynrei lada kan ktah kum ka seng ka pynpaw ïa ka jingpyrshah.
U la ong ruh ba ka seng ka kren shai ba ka kam pynbeit pud kam dei ban don kano kano ka jingïatyngkhuh bad ki kam pynroi.
U Bah Serbilin u la ong, na ka liang jong u DC u la pynshai ba kala don ka jingïatip lang jong ka Sorkar Meghalaya bad ka Assam bad u la pynshai ruh ha kaba ïadei bad ki projek ha katei ka thaiñ ba na ka liang ka Sorkar Meghalaya ruh ka trei na ka bynta ka skhim sam um ha ki longïing katei ka thaiñ bad ka Assam ruh kam shym la pynthud eiei.
