Mawkyrwat, Rymphang 27
Kawei ka ïing ha Kensohsan kaba hap hapoh ka Ranikor Civil Sub – Division ha South West Khasi Hills District ka la shah bam duh ha ka ding kaba la klang katta-katta kumjuh ki jingdon jingem baroh ki la julor lut.
Katkum ki tyllong khubor ba la ïohlum la ïathuh ba katei ka jingjia ka la jia ha ka step jong ka 26 tarik u Rymphang 2025 ha ka por kumba 11:30 eiei bad donbok ha katei ka jingjia ym shym la don ba mynsaw ne jingjia ba sngewsih.
Katei ka ïing ka dei ka jong ka Kong Debora Thongni bad u Bah Twinkle Pahsyntiew kiba don 8 ngut ki khun.
Katkum ka jingïathuh u Bah Twinkle Pahsyntiew, trai jong katei ka ïing, u la ong ba mar ïa jia katei ka jingjia ki marjan-marpa ki la ïamih ban tem ïa ka ding hynrei kim shym la lah ban leh eiei shuh namar ka jingklang stet jong ka ding.
U la ïathuh ruh ba um lah satia ban tip ïa ka daw jong ka jingkem ding bad um don ruh ka jingsuba sniew ïano-ïano. Nangta u la ïathuh ruh ba ka jingjulor baroh la antad ba ka la kot sha ka T.2.50 lak tyngka kynthup ïa u synsar 18 quintal, ka pisa T.50,000 bad ki kiwei kiwei ki jingdon jingem.
Ha kaba ïadei bad katei ka jingjia, na ka liang u MLA bad MDC ka thaiñ, Bah Pius Marweiñ mar ïa ïoh jingtip wut-wut u la leit ai jingïarap ïa katei ka longïing kaba la mad ïa ka jingjia ba sngewsih da ka pisa bad ki tin kumba 4 ban eiei na ka bynta ba kin ïoh shna ïa ka ïing ban sah shipor.
