Nongpoh, Rymphang 27
Kawei ka ïing kaba don ha ka shnong Umsmu kaba dang hap hapoh ka jingpeit jong ka thanad Umsning, ka la shah bam duh ha ki thylliej ding kiba klang bha, haduh ba baroh ki jingdon jingem ki la kylla dpei lut.
Kane ka jingjia ka la jia ha ka 26 tarik mynta u bnai bad ha kane ka jingjia, ym tang ka ïing hynrei wat u synsar uba dang shu dep ban kheit bad buh marjan bad ka ïing ruh u la ingkhong lut.
Katkum ka jingtip kaba la ïoh lum, la ïathuh ba katei ka jingjia ka dei ha ka por kumba 2 baje eiei nohphai sngi bad ka dei kaba la ngat ha ka longïing jong ka Kong Merrilin Mawlong.
Haba ïoh ban ïakren bad katei ka longkmie, ka la ïathuh ba katei ka jingkem ding kynsan jong ka ïing ka jong ka, ka dei ha ka por kaba ym shym la poi pyrkhat satia bad pynpaw ruh ïa ka jingsuba ba lehse ki lah ban don ki ‘riew shimkabu ki bym lah satia ban tip, kiba la wiang ding ïa u phlang uba la dep ot ïa uba la buh marjan bad ka ïingsah ka jong ka.
Ka Kong Merrilin ka la ïathuh ruh ba ha kane ka jingjia, ki jingdon jingem baroh kiba don hapoh ka ïing, ki la duh lut ba kynthup ruh wat ïa ki tiar pynmeh bording na ka sngi (solar power energy) bad u synsar uba ki dang shu dep ban kheit ha kine ki khyndiat taïew na lyngkha.
Wat lada kam shym la don kano kano ka jingjia ba sngewsih ïa ki mynsiem briew, hynrei na ka liang ka Kong Merrilin, kala pynpaw ïa ka jingsngewsih kthang ban duh noh ïa la ka ïing ka sem bad ki jingdon jingem baroh ryngkat bad ki mar rep mar riang kiba ju ai kamai ban bsa ïa ka ïing ka sem baroh shi katta.
