Shillong, Rymphang 27
Ki runar ki bym lah ban ithuh durkhmat ki la ïoh ban rah ei ïa ka pisa kaba la kot da ki lak tyngka na uwei u briew, hadien ba ki la pynkynslok (sniff) jubor da ki kynja jingdih pynbuiad ïa u.
Katkum ka khubor kaba la ïoh na ki pulit la ong ba uwei u nongshong shnong jong ka West Jaiñtia Hills u la ujor ba ha ka 18 tarik mynta u bnai, ha ka por kumba 11 baje mynstep, ki saw ngut ki briew bym lah ban ithuh ki la wan sha u ha ka shnong Ïalong ha WJH bad ban kyrpad ïa u ban leit buh ïa ki ha lad Sabah, 4th Mile ha WJH da ka kali jong u.
Hynrei la ong ba katba ki dang don ha lynti, kine ki briew bym lah ban ithuh, ki la byrngem byrsit ïa une u briew da kaba pynap da ka tari bad ha kaba la pynbor ïa u ban ñiah ïa ka kali sha ka bynta jong ka shnong Nangbah.
Shuh shuh la ong ba ha kane ka por, na ka liang kine ki runar ki la pynbor ruh ïa u ban kynslok (sniff) ïa ki kynja jingdih buaid, bad tang hadien katto katne, une u briew um tip briew shuh.
Na ka liang jong kine ki runar, hadien ba ki la ïohi ba une u briew um tip briew shuh, ki la rah ei noh ïa ka pisa kaba long T.4 lak na une u briew.
Ha kaba ïadei bad kane ka jingjia, na ka liang jong ki pulit hadien ba ki la ïoh ka jingujor, mynta ki dang pynlong ïa ka jingtohkit ban lap ïa ki jingshisha baroh bad ruh ban thwet ïa ki runar kiba donkti ha kane ka kam.
