Shillong, Rymphang 27
U Nongaiktien ka Sorkar MDA-II uba dei ruh u Myntri ka Sorkar Jylla, Bah Paul Lyngdoh u la ïathuh ba ka jingshim bad kylliang jaka na ka bynta ban pynheh ïa ka kad liengsuiñ ‘Shillong Airport’ ka la sdang ban ïaid, bad ong ruh ba la kumno-kumno ka jingpynheh ïa ka lynti ïaid (runway) jong ka kad liengsuiñ ha Umroi ka dei ban dep noh hapoh u snem 2026.
“U Myntri Rangbah u la pyntip hapoh ka Kynhun Myntri halor ka kam ban pynheh ïa ka kad liengsuiñ, kumba long mynta, ngi la dei ban ïoh tang ïa ka ‘runway’ hashwa ban kut u snem 2026”, la ong u Bah Paul haba kren bad ki lad pathai khubor ha ka sngi Palei.
Nalor kane u Myntri ba khmih ïa ka kam Jngohkai ha ka Jylla u la ong ba ka la don ka jingïakren hapdeng ki tnat ka Sorkar Pdeng ha Delhi, ha kaba u la pyntip ba ka jingïakylliang ïa ka jaka hapdeng ka Sorkar Jylla bad ka tnat Ïada Ri (Defence) ka la sdang ban ïaid.
“U Myntri Rangbah u la pynthikna ïa ngi ba un sa dang pyntip shuh-shuh ïa ka jingïaid jong ka kam hapoh ka Kynhun Myntri. Nalor kane u (CM) la kular ruh ban buddien biang ïa kane kam da kaba ïakynduh ïa ki tnat ba dei khmih hadien ka dorbar mang tyngka”, la pyntip u Bah Paul.
Ka jingthmu ban pynheh noh ïa ka kad liengsuiñ ‘Shillong Airport’ ka long hadien ba ka Airport Authority of India (AAI) ka la ai ïa ka kaiphot kaba arsien ba lah ban pynheh ïa katei ka kad liengsuiñ.
Ha ka jingjurip ba la pynlong ha u Nailur mynshem snem, la ïathuh ba ka jingpynheh ïa ka kad liengsuiñ lah ban leh sha ka phang ba Shathie (South), bad donkam shuh-shuh ka jaka sa 16 akar na ka bynta kane, katba 6 akar pat ka jaka donkam na ka bynta ban pynïeng ïa ki liengsuiñ, bad na ka bynta ka lynti ïaid (runway) ka dang donkam shuh sa 900 meter ban pynjrong na ka bynta ban lah ïaid ki liengsuiñ kiba kham heh.
