Shillong, Nailur 22
Ki nongshet ja ha ki skul hapoh ka shatri ka Union of Cook cum Helper PM Poshan Meghalaya, ha ka 22 tarik u Nailur 2026, ki la pynlong ka jingïakhih da kaba shong kyllaiñ myngor ha Khyndailad, Shillong.
Kane ka jingmih surok ki nongshet ja skul, kadei namar ba wat hadien 22 sngi ba ki la sangeh leit shet ja ha ki skul, ka Sorkar Pdeng bad ka Sorkar Meghalaya kim shym la jubab ïa ka jingdawa jong ki.
Haba kren sha ki lad pathai khubor ka President jong ka Union of Cook cum Helper PM Poshan Meghalaya ka Kong Gina Nengnong ka la ong ba naduh 2023 ka Union ka la thoh sha u Myntri Rangbahduh ka ri u Narendra Modi, sha u Myntri ka tnad Pule Puthi ka Sorkar Pdeng ban pynsngew ïa ki mat jingdawa, hynrei haduh mynta ka Union kam pat ïoh satia ïa ka jubab.
Ka Kong Gina ka la ong ba ka Union ka dawa na ka Sorkar Pdeng, ban kyntiew ïa ka bhah bainong na ka T.900 sha ka T.9000 shibnai, namar ki nongshet ja skul ki shem jingeh ban pyndap ïa ki jingdonkam namar ba la kiew ki marbam bad kiwei ki mar ki mata.
Ka la ong ba ka rukom siew bainong ïa ki nongshet ja kadei 90% na ka Sorkar Pdeng bad 10% na ka Sorkar Jylla.
“Ka Sorkar Meghalaya ha u snem 2022, ka la pynkiew na ka T.100 sha ka T.1100 kaba mut T.2000 ha ka shi bnai, hynrei haduh mynta ka bhah jong ka Sorkar Pdeng ka dang dei beit T.900 ha ka shi bnai” la ong ka Kong Gina.
Kumta ka la dawa ba ka Sorkar Pdeng, kadei ban pynkiew noh ïa ka jingsiew bainong ba kin lah ban pyndap ïa ka ïing ka sem.
