Nongstoiñ, Nailur 22
Ka jingsngap mynthi jong ka Sorkar Pdeng ïa ka jingdawa jong ka kynhun ki nongshet ja sngi (Midday Meal) ïa ki khynnah skul ïa kaba la tip kum ka Union of Cook Cum Helper PM Poshan Meghalaya, ban kyntiew noh ïa ka ‘honorarium’ ka jong ki, kaba dang pynneh haduh mynta 9 spah tyngka, kala pynlong ïa kane ka kynhun na West Khasi Hills ha ka sngi Ba-ar ban ïashim bynta ha ryngkat ki khun rit ha ka ‘peaceful sit-in protest’ lane ka jingshong ïakhih ba jai jai ïa kaba la pynlong ha basketball court officer club Nongstoiñ.
Ka Kong Peaceful Marweiñ, President ka Union of Cook Cum Helper PM Poshan Meghalaya West Khasi Hills ha ka jingdon lang ka Kong Armelin Mawlieh, Secretary haba kren bad u nongthoh khubor ki la ong ba bane ka jingdawa kam dei tang mynta, kala ïaid da ki saw bad san snem hynrei haduh mynta ka Sorkar Pdeng ka dang pynneh hi ïa ka 9 spah na ka bynta ki nongshet ja.
Ki la ïathuh ba haba ki ïaid lynti ha ka kam kaba ki trei ki mad ïa kiba bun ki jingeh namar kiba bun ki nongshet ja skul ki dei ki kynthei bad katkum ka kam kaba ki, ki trei ki shem jingeh namar ka jingsiew kala long kaba rit palat bad lada yn kheiñ ka dang long tang 60 tyngka shi sngi ba ki ïoh, hynrei katkum ka jingïaid jong ka por la ïohi ba ki mar ki mata ki la kiew lut bad lada pyrkhat ïa ka jingsiew kam ïahap shuh, ka jingsiew kaba rit na kiba rit tam bad kiba poh na kiba poh tam.
Na ka liang jong ki, ki la kyntu ïa ka Sorkar Pdeng ba kan shimkhia ban pynkiew noh, namar mynta da ki phew snem ki la shakri hok ïa ka kam hynrei ka dang pynneh ïa ka jingai ka jong ka.
