Shillong, Nailur 22
Ka Voice of the People Party (VPP) State Youth Wing, ha ka 22 tarik Nailur, 2026, ka la leit ban kynduh ïa u Bah R.S Nongbri, Chief Engineer ka tnad Public Health Engineering (PHE), ban ïakren halor ka jingïohpdiang ïa ki jingujor, ba ka la don ka jingleh sop-sop na ka tnad PHE Mawphlang Division, ban khot tender na bynta ki scrap, khlem ka jingpynbna paidbah.
Hynrei namar ka jingbymdon jong u CE hapoh ka ophis treikam, ki nongïalam ka SYW ki la ïakren bad u lyngba ka phone.
Haba kren sha ki lad pathai khubor, u Bah Marbud Dkhar, President, u la ong ba ka long ka bym lah ban pdiang ban khot sop-sop ïa ka scrap tender, kaba don kumba 500 ton, khlem ka jingpynbna paidbah.
U Bah Marbud u la ong ruh, ba ka ka jingkhot tender halor kane ka kam, ka tnad PHE Mawphlang kam shym la khot da kaba shai ne ban buh da kata ka advertisement, kaba la pynlyngngoh ïa ka VPP, haba sngap ïa ka jingujor ki paidbah.
U la ong ba kum kine ki jingjia ki ju jia man la ka por haba ïadei bad ka jingleh sop-sop ha kino-kino ki bynta bad kumta ka VPP kam lah ban pdiang ha ryngkat ka jingdawa, ba dei ban pynduh shuwa ïa kane ka jingkhot tender.
“Ngi pyrshah jur ïa ka jingleh ka tnad PHE. Wat pat ai hano-hano ïa kane ka kam scrap tender, kaba la shu khot buhrieh bad khot sop-sop napoh tang ba ïa ithuh ithaw. Na ka liang jong ngi ngin nym ailad da leilei ruh, lada jia ba kane ka kam kan ïaid beit shakhmat,” u la bynrap.
Kumta u la pynkut da kaba ong ba ka VPP hi kan nym ailad ïa kum kine ki kam buit tuh, ki kam buhrieh, ki kam sop-sop, kiba don ha ki tnad treikam bapher-bapher jong ki ophis Sorkar.
