Shillong, Nailur 22
U Superintendent of Police (Traffic) ka East Khasi Hills u Hari Prasath MR ha ka sngi Ba-ar u la ong ba ki la ïoh pdiang ïa ka ‘legal notice’ ba la ai da ka Khasi Students’ Union (KSU) bad kan sa ai jubab lyngba ki lynti jong ka aiñ.
Lah ban kdew ba ka KSU ha ka sngi Nyngkong kala ai da ka ‘legal notice’ ïa u SP (City), Shillong Bah Dangsan Khyriem bad SP Traffic Hari Prasath MR.
“Hooid, ngi la ïoh pdiang ïa ka ‘legal notice’. Ïa mynta kan nym pat long ban kynthoh eiei ïa kaei kaba don ha kane ka notice. Namar ba ka dei ka ‘legal notice’, ngin sa jubab lyngba ki lynti jong ka aiñ kiba dei,” ong u Hari Prasath.
Ka KSU kala dawa ba kine ki heh pulit ki dei ban pan map hakhmat u paidbah lyngba ki lad pathai khubor bad ban nym pynmih shuh ïa ki jingkynnoh ba bakla bad ba pynjah burom pyrshah ïa ka KSU, ïa ki dkhot bad ki nongïalam bad ïa kane dei ban leh hapoh ki 15 sngi.
Haba kyntait ban ïathuh bniah, u SP u la ong, “Kam don satia kano-kano ka jingkynthoh ïa mynta halor kane ka shithi. Ka dei da ka lynti jong ka aiñ bad ngi ruh ngin ïaid lyngba ki lynti jong ka aiñ.”
“Kum ka tnad ba pyntreikam ïa ka aiñ, ki don katto katne ki rukom treikam ha man ki kam bad ïa kane hap ban ïaid lyngba ki lynti ka aiñ. Kam ïahap ïa nga ban kynthoh eiei,” u la ong.
