Shillong, Rymphang 27
Baroh 58 ngut ki MDC kiba la shah jied thymmai biang ha ka ilekshon kaba dang shu dep sha Khasi Hills Autonomous Dis-trict Council (KHADC) bad sha Jaiñtia Hills Autonomous District Council (JHADC) ki la shah pynbam smai kum ki dkhot ba pura jong ka ïingdorbar ha ka sngi Palei.
Haba phai sha KHADC, ka Deputy Commissioner jong ka East Khasi Hills ka Kong RM Kurbah kala shim ïa ka bynta ban pynbam smai ïa ki 29 ngut ki MDC kiba la shah jied thymmai kaba la long ha dorbar ka KHADC. Napdeng ki 29 ngut, 17 ngut ki dei ki MDC ka VPP, 5 ngut jong ka UDP, 4 ngut ka NPP, HSPDP-1 bad MDC shimet arngut.
Kine ki MDC ki kynthup ruh ïa 4 ngut ki longkmie – ka Kong Grace Mary Kharpuri na Nongshken, ka Kong Rona Khymdeit na Nongpoh, Kong Deity Majaw na Malki- Laitumkhrah bad ka Kong Aibandaplin Lyngdoh Nonglait na Mylliem Konstitwensi.
Ha kane ka jingbam smai, u MDC ba la kham rangbah uba mihkhmat na Sohra konstitwensi u Bah Titos Chyne na ka UDP, u la bam smai da kaba pule ha ka ktien Khasi katba kiwei ki MDC ki bam smai da kaba pule ha ka ktien phareng.
Kumjuh ruh ki MDC ba thymmai ki la rwai ïa ka jingrwai ‘Ri Khasi Ri Khasi’ hashwa ba kin bam smai hapoh i?ingdorbar ka KHADC ba la pynïaid da ka Deputy Commissioner Kong Rosetta Mary Kurbah ha ka jingwan synranlang kiba haïing hasem bad ki nongkitkam jong ki seng saiñpyrthei bapher bapher.
Ki ar ngut ki MLA ka VPP u Bah Brightstarwell Marbaniang na Mawlai bad u Bah Heavingstone Kharpan na Mawryngkneng ki la wan synranlang ïa ki 17 ngut ki MDC kiba dang shah jied thymmai jong ka VPP haba ki bam smai ha kane ka sngi.
Haba phai pat sha Jaintia Hills Autonomous District Council (JHADC), baroh ki 29 ngut ki MDC kiba la shah jied thymmai ha kane ka ilekshon ba dang shu dep, ki la bam smai kum ki dkhot ba pura jong ka ïingdorbar ka JHADC bad ïa ka bynta ban pynbam smai la shim da u Deputy Commissioner jong ka West Jaintia Hills District u AK Singh, IAS.
Na ki 29 ngut ki MDC ba mynta, 14 ngut ki dei kiba dang long MDC ha ka sien kaba nyngkong bad ruh ha kane ka kynti ki don lai ngut ki kynthei.
Na ki 14 ngut ki MDC kiba thymmai, 7 ngut ki dei ki MDC jong ka VPP bad kine ki long u Jamshaphrang Pohtam na War Central, u Nehimia Lamara na Mukhla Ummulong, u Daeimi Liam na Shiliang Myntang, ka Laiawnlam Jinghun Khyriem na Mynso Nongjngi, u Gresentus Susngi na Nangbah Mihmyntdu, u Soki Lapasam na Muthlong Sohkymphor bad ka Deivipaya Tongper na Narpuh.
Ka National People’s Party (NPP) ka la pynmih lai ngut ki MDC kiba thymmai bad kita ki long u Reformingson Lamare na Nartiang Wahiajer, u Wormanship Shadap na Mowkaiaw bad u Mihnyngkong Sutnga na Shangpung.
Katba ka Congress ka la sei ar ngut ki MDC bathymmai bad kita ki long u MDC jong ka Saphai Sahsniang u Rikut Parien bad u MDC jong ka Saipung Nongkhlieh u Lalwilliama Theite. Ka United Democratic Party (UDP) ka la pynmih arngut ki MDC ba thymmai bad kita ki long u MDC ka War East u Medling M Swer bad u MDC ka Musniang Rangad u Wailadameshwa Siangshai.
Napdeng ki 15 ngut ki MDC barim ne kiba la ju long teng, ki don haduh san ngut ki MDC kiba la long Chief Executive Member teng bad kita u long u MDC ka Modop Umladang u Thombor Shiwat, u MDC ka Amwi Khliehtyrchi u Madonbai Rymbai, u MDC ka Jowai North u A Andrew Shullai, u MDC ka Sutnga Nongkhlieh u Hambertus Nongtdu bad u MDC ka Jowai South u Moonlight Pariat.
Shuh shuh napdeng ki 29 ngut ki MDC, arngut na ki ki dei ki nongïalam seng mynshwa bad kita ki long u MDC ka Saphai Sahsniang u Rikut Parien uba la long teng u President ka JSU bad u MDC ka Shiliang Myntang u Daeimi Liam uba long teng u nongïalam ka KSU.
