Jowai, Rymphang 27
Ka Sorkar Meghalaya ha u snem 2022 ka la shim ïa ka rai ban buh noh ïa ka khyrdop treikam ki pulit ne ka Border Outpost (BOP) jong ka Meghalaya Police ha ka shnong Mukroh, West Jaintia Hills District nalor kiwei kiwei de ki jaka hynrei haduh mynta mynne katei ka BOP ha ka shnong Mukroh kam pat urlong satia.
Hadien ka jingshim rai jong ka Sorkar Jylla, ka Dorbar Shnong Mukroh naduh u snem 2022 ka la shim ïa ka rai ban dawa ban buh ïa ka BOP ha Mootha Siang Kwai kaba long ha khappud jong ka shnong bad ka Elaka Labang Nongphyllut ne Block-I.
Khnang ban pynbor ïa ka Sorkar Jylla ban buh noh ïa ka BOP ha katei ka jaka, ki nongshong shnong jong ka Mukroh ki la rai ruh ban nym ïashim bynta ha ka ilekshon MDC hynrei ki la weng noh ïa katei ka rai hadien ka jingkular jong ki bor pynïaid district ban buh ïa ka BOP. Hynrei na ka bynta ka jingshong shngaiñ jong ki nongshong shnong ka Mukroh, ka Sorkar ka la buh ïa ka Temporary Camp jong ki pulit Meghalaya ha Lumpalang, Mukroh hadien ka jingjia jingïasiat ha u snem 2022.
Ha kawei pat ka liang, katkum ka jingbthah jong ki bor pynïaid district jong ka West Jaintia Hills, ka Dorbar Shnong Mukroh ka la khot pynlong ïa ka jingïakynduh lang hapdeng ki nongshong shnong bad ki heh ophisar jong ka District kiba kynthup ïa ka Additional Deputy Commissioner ka Kong B Blah, u Assistant Commissioner Ma GH Passah bad u Additional Superintendent of Police u Ishan Gupta nalor kiwei kiwei de ha madan Syiem Slein, Mukroh ha ka 26 tarik mynta u bnai.
Ïa kane ka jingïakynduh lang la pynïaid da u Assistant Waheh Shnong jong ka Dorbar Shnong Mukroh u Ma Shanbor Sumer bad la don ryngkat u Waheh Shnong Ma Kitlang Maskut bad u Secretary Shnong Ma Precious Sten bad da ki spah ngut ki nongshong shnong.
Haba shim bynta ha katei ka jingïakynduh lang, u Ma Precious u la ïathuh ba ka Dorbar Shnong ha u bnai Kyllalyngkot, 2025 ka la shim ruh ïa ka rai ban nym ïashim bynta ha ka ilekshon MDC namar ka jingpynslem jong ka Sorkar Jylla ban buh ïa ka Border Outpost ha Mootha Siang Kwai kaba long hapoh u pud u sam jong ka shnong Mukroh katkum ka ‘notification’ bala pynmih da ka JHADC ha u snem 1968 bad kumjuh ruh katkum ka ‘notification’ bala pynmih da ka Sorkar Assam ha u snem 1951, ka kdew shai ba ka Block-I ka kut ha ka shnong Umkhyrmi.
Shuh shuh u la ong, na ka liang ka Dorbar Shnong ka la dep pynpoi ïa ka shithi sha Ma Passah ba ai jaka haduh 1.58 akar ha Mootha Siang Kwai sha ka Sorkar ban shna ïa ka BOP ha katei ka jaka. U la pynkynmaw ruh ba ka Dorbar Shnong ka la dawa ïa ka jingpahara pulit ne patrolling kaba 24×7, ka jingweng noh ïa ki jingtei beaiñ jong ka Assam hapoh u pud u sam jong ka shnong Mukroh bad ka jingshimkhia mardor halor kino kino ki jingshah pyndik jong ki nongshong shnong ha ki bor Assam ne kino kino ki kynhun ha ki khappud.
Na ka liang jong u Ma Passah u la ong ba u sngew ïahap ïa ka jingdawa ban buh ïa ka BOP ha Mootha Siang Kwai namar ka dang hap hapoh u pud u sam jong ka shnong Mukroh katkum ka ‘notification’ bala pynmih da ka JHADC ha u snem 1968. Katba na ka liang jong u Ishan Gupta u la ong, ïa kane ka jingdawa jong ka Dorbar Shnong yn hap rah sha ki bor bahalor.
Haba jubab halor ka jingdawa ban buh BOP ha Mootha Siang Kwai, ka Kong Blah ka la ong ba tang hapoh district “Ngin ym lah ban shim ïa kane ka rai hynrei na ka liang jong ngi ngin pynpoi ïa ki kot ki sla ba la ai na ka shnong sha ka Sorkar bad ban pyni ruh ïa ki jingdawa jong ka shnong.”
Ka la ai khublei ïa ka dorbar shnong jong ka shnong Mukroh namar kila kloi ban shim bynta bad ïatrei ryngkat bad ka bor pynïaid district ban pynïaid beit ïa ka ilekshon JHADC kaba jop. Kane hi ka pyni ïa ka jingskhem ka jingmut jingpyrkhat bad ka jingskhem jong ka shnong Mukroh ban jied ïa uta u nongmihkhmat uba biang.
Nalorkata, ka Kong Blah ka ong ba lyngba ka jingïatreilang kan wanrah ruh ïa ka jingjop namar khlem da ka jingïatreilang kano kano ka kam ju urlong.
Hadien ka jingïalang, ki heh ophisar jong ka District kiba kynthup ïa u Ma Passah bad Gupta ki la leit jurip ïa ka Temporary Camp jong ki pulit Meghalaya ha Lumpalang, Mukroh bad kumjuh ruh ïa ka jaka sah ba shipor jong ki pulit ha ka dorbar hall jong ka shnong Mukroh.
