Shillong, Rymphang 27
U Myntri Khynnah ka tnad pule-puthi ka Sorkar Pdeng, Dr. Sukanta Majumdar ha ka Sngi Balang u la kular ba shen ka tnad kan sa pynbeit noh halor ki kynrum-kynram ba ïadei bad ka North Eastern Hill University (NEHU).
“Ngi la peitngor bha ïa kane bad ngi kwah ban pynduna ïa ka. Nga kyrmen ba ngin lah ban pynduna ïa ki jingeh bad kaei-kaei kaba ki ïakynduh naba ki samla pule ki dei ka bynta ba kongsan eh jong kano-kano ka shlem pule bad kumta ka tnad jong ngi ka la kynjoh ktien bad ki bor pynïaid bad ngin sa lah ban pynbeit noh shen ïa kine kiei-kiei baroh,” ong u Dr. Majumdar haba kren sha ki lad pathai khubor.
Halor ka jingdawa ban weng noh ïa u Vice Chancellor (VC) ka NEHU, u Myntri ha kawei ka liang u la ong ba ka skulbah ka dei kaba synshar hi bad ka don la ka rukom ban thung ïa u Vice-Chancellor.
“Kumta, phim lah ban bujli ïa u VC katkum ka jingdawa. Kam lah ban long hynrei ka Sorkar India ka kynjoh ktien beit bad ki heh ophisar (bad ki bor pynïaid jong ka skulbah),” u la bynrap.
