Shillong, Rymphang 27
U Bah Shemborlang Rynjah, u MDC ka Voice of the People Party (VPP) un sa shimti ïa ka shuki Chief Executive Member (CEM) jong ka Khasi Hills Autonomous District Council (KHA-DC) da kaba suk lashai ka sngi ka 28 tarik Rym-phang 2025 namar ki MDC ka liang pyrshah ki khlem pynïeng kyrtong.
Ym tang ïa ka shuki CEM, hynrei ka VPP kan jop suk ruh wat ïa ka shuki Chairman, kaba la pynïeng da u Bah Strongpillar Kharjana, MDC ka Mawkhar-Pynthorumkhrah namar ka jingbym pynïeng kyrtong ki MDC ka liang pyrshah.
Hadien ba ka Deputy Commissioner (DC) ka East Khasi Hills District ka la dep pynbam smai ïa ki MDC ha ïingdorbar ka KHADC, ki MDC ka VPP ki la leit synran ïa u Bah Shemborlang Rynjah ban leit thep kyrteng ïa ka shuki CEM bad ïa u Bah Strongpillar Kharjana ban thep kyrteng ïa ka shuki shongknor.
Ki MDC ka liang pyrshah kiba don 12 ngut, kiba kynthup ïa ka NPP, UDP, HSPDP bad ki MDC shimet ki la dep shong jingïalang hadien ba la wai ka jingbam smai bad ki la rai ban nym pynïeng kyrtong ha kine ki ar tylli ki shuki.
Da ka jingbym pynïeng kyrtong ki MDC ka liang pyrshah, u Bah Shemborlang Rynjah un sa shimti ïa ka shuki CEM lashai ka sngi ka 28 tarik Rymphang ha ka por 2:00 baje mynsngi kata hadien ka jingshimti jong u Bah Strongpillar Kharjana ïa ka shuki shongknor ha ka por 11:00 baje mynstep.
Hadien ba u CEM u la dep shah jied lashai ka sngi, un sa bate pat ïa ki tnat treikam bapher bapher ha ki Executive Member kiba ka VPP ka la dep jied.
