Nongpoh, Rymphang 28
Ka jingthmu jong ki pulit ka Jylla Assam ban pynlong ïa ka jingtohkit ha ka skulbah University of Science and Technology Meghalaya (USTM), ka la pulom noh mynta ka sngi hadien ba na ka liang ki bor pulit ka Ri-Bhoi kim shym la ai bor satia ïa ki (pulit Assam) ban pyndep ïa katei ka kam kaba ki thmu. Kum ban shu kdew, katei ka jingthmu ki pulit ka Jylla Assam ban pynlong ïa ka jingtohkit pyrshah ïa katei ka skulbah ka dei hadien ka jingshah ujor mukotduma u Mahbubul Hoque ha Karimganj, uba dei u Chancellor jong katei ka skulbah halor ka jingdonkti ban ïarap pynïoh ‘mark’ kham bun ïa ki samla pule kiba dei na ka skul kaba la seng da u Chancellor ka USTM lyngba ka Education Research and Development Foundation (ERDF) kiba ïakhun ïa ka eksamin klas 12 ha Patharkandi jong ka Jylla Assam.
Kum ban shu kdew hangne, u Myntri Rangbah ka Jylla Assam, u Himanta Biswa Sarma u la dep ruh ban thad madan ïa ka kyrteng jong kitei ki samla pule lyngba ka rynsan laad pathai ‘X’.
Haba wad jingtip halor kane ka bynta, na ka liang u Senior Superintendent of Police ka Ri-Bhoi District, u Vivekanand Singh Rathore, u la ïathuh ba ki bor pulit ka Jylla Assam kiba la wan poi mynta ka sngi, ki la wan ban pan ïa ka jingïarap na ka thanat Khanapara ban ïoh khynra ïa katei ka skulbah, hynrei hadien ka jingbym ai bor satia ki pulit katei ka thanat, ki bor pulit ka Jylla Assam, ki la hap ban leit phai thylli biang sha la ka Jylla.
U Vivekanand Singh Rathore, u la ong ba ka jingbym ai bor jong ki pulit halor katei ka jingthmu jong ki bor pulit Assam ban pynlong ïa ka jingtohkit pyrshah ïa katei ka skulbah ka dei namarba ïoh kan ktah ïa ka shong suk shongsaiñ, khamtam ruh ba na ka liang ka Myntri ka Sorkar Kmie ba dei khmih ïa ka kam pla tyngka ka ri, ka Nirmala Sitharaman kan wan ban ïuh kjat ha ka Jylla ha ka Sngi U Blei, kata ka 2 tarik u Lber, 2025.
Utei u heh pulit ka Ri-Bhoi u la ïathuh ruh ba ka jingbym shah jong ki pulit ka Ri-Bhoi ïa ki pulit ka Jylla Assam ban pynlong ïa katei ka jingkhynra ka dei halor ka nongrim ba kim don satia ïa ki kot ki sla na ka Ïingbishar (search warrant) shwa ban pynlong ïa ka jingkhynra.
