Shillong, Rymphang 28
Ki nongtrei bylla sngi jong ka Secretariat ha ka Sngi Thohdieng ki la pynlong ïa ka jingïakhih shong kyllaiñ mungor ha Madan Malki kum ka dak ka jingpyrshah halor ka jingshah weng kam jong ki naduh u bnai Kyllalyngkot mynta u snem.
Kitei ki nongtrei ba kynthup ïa ki nongpynkhuid, ‘Mali’, nongsar bad ‘Chowkidar’ kiba la pynlong ïa ka jingïakhih ki la dawa ruh na ka Sorkar ban thung kam biang ïa ki.
“Ngi la mih madan namar ka jingshah pynduh kam jong ngi na Secretariat, nga trei kum ka nongpynkhuid bad mynta u snem ngan dap 10 snem,” ong ka Kong R. Kharpran, kawei na ki nongtrei haba kren sha ki lad pathai khubor.
Haba kylli la ki don ne em ki kot ki sla ban pynshisha halor ka jingthung kam, ka Kong Kharpran ka la ong ba namarba ki hap ha ka ‘Daily Wages’, kumta kim don kot don sla bad la shu khot ïa ki da u Nazir naba don ki kam ba lait.
Haba kylli, ka la ong, “Naduh u bnai Kyllalyngkot mynta u snem, u Nazir u shu ong beit ba hap sangeh noh shuwa ïa ka kam naba ka tnad Pla Tyngka kam don pisa.”
Haba kyrpad ïa ka Sorkar ban isynei lem ïa ki halor kane ka liang, ka la ong ba ki don kiba la trei la 10 snem, 12-13 snem (bad kiba hapoh kumjuh), bad ka por thep kam jong ki, kim ïoh shuh, khamtam ba ki la don la ki khun ki kti bad ki mad ïa kiba bun ki jingeh.
Ha kawei ka liang, ka la pynpaw ba don pat katto-katne kiba trei kum ma ki hynrei kiba khlem shah weng kam.
Haba kylli balei, ka la ong, “Ka daw te tharai ki don jingïadei bad u Nazir.”
Haba pynsngew ba ki la don ruh katto-katne na ki kiba la leit sha u Myntri Rangbah halor katei ka bynta ha u Kyllalyngkot, ka Kong Kharpran ka la ong, “U (Myntri Rangbah) ong ba hapoh Secretariat ba kat haduh mynta, kam pat don kum kata ban shah weng kam bad ngim don jingtip eiei ïa kata. Ngi la pyni ïa ka thup kyrteng ba shah beh…u ong ba ngi dang pyrkhat ban pynskhem noh ïa ka kam, tangba shu kut tang ka ktien.”
Na ka liang jong kitei ki nongtrei kiba don kumba 30 ngut eiei, ki la ïathuh ba ki la leit biang ha u PA jong u Myntri Rangbah hynrei u la pynsngew sha ki ba u Myntri Rangbah um treh ïakren shuh bad ki bad kumta kim banse ban shim ïa kane ka sienjam.
