Shillong, Rymphang 28
U Nongïalam ka Liang Pyrshah hapoh Ïingdorbar Thaw Aiñ uba dei MLA ka AITC, Dr. Mukul Sangma, u la ong ka jingshah rem noh ki seng saiñpyrthei kiba heh ha ka ilekshon MDC ba dang shen, ka dei namar ka jingbym lah ban pynbeit ïa ki jingeh ba ïatyngkhuh hapoh ka Jylla, khamtam ha kaba ïadei bad ki samla.
Haba kren bad ki lad pathai khubor ha ka Sngi Thohdieng, u Myntri Rangbah barim u la ong ba ka saiñpyrthei ha ka Jylla ka la kylla, ha kaba ka seng Congress ha ka sien ba nyngkong ha ka Jylla ka la thylli khlem don ba jop bad kumjuh kiwei ki seng ruh, hynrei kaba kham kongsan ka long ba ka seng National People’s Party (NPP) kaba don ha ka bor ka la jop tang ha 4 tylli ki konstitwensi ha ka ilekshon sha KHADC ka buh ïa u dak jingkylli ba heh.
“Ka seng saiñpyrthei kaba la pyni ïa ki rukom treikam da kaba la ïa suhbuit lypa, ki kut tang ha ka ban pyndonkam bakla ïa ki bor pynïaid, pyndonkam bakla ïa la ka bor ha ka por ilekshon ban pynthikna ïa ka jingjop ha ki konstitwensi jong ki, jer ma phi bad phi ruh phi tip, hynrei nalor kine kiei-kiei ki la jop tang 4 jaka. Kane ka dei ka jingkylli kaba khraw, phi hap ban kylli kumno ki ïoh tang katne tylli kaba long kumba khlem ïoh eiei”, la ong u Mukul.
U Nongïalam ka Liang Pyrshah u la ong ba kane ka ilekshon ba dang shu dep ka dei ban kyrsiew thiah ïa ki nongïalam seng saiñpyrthei kiba don ha ka Sorkar, bad dei ban pynkynmaw ïa ka jingbym lah jong ki ban pyndep ïa ka kamram ha kaba ïadei bad ki jingeh ba bun kiba ïatyngkhuh bad ki paidbah.
Haba kynthoh halor ka jingjop kput jong ka Voice of the People Party (VPP) ha ka ilekshon MDC, u Dr. Mukul u la ong ba kam dei kaba sngew phylla, bad ka dei kaba la ïohi bad ithuh lypa ba kan jia.
“Ka dei kaba la sngewthuh lypa bad kaba la ïohi lypa bad ka dei ka jingpynpaw jong ki paidbah ïa kaba ki don hapoh. Mynta phi lah ban shim na ka jingmih ha ka ilekshon, phin ïohi ba bun na ki ‘vote’ kiba leit sha ka VPP ki dei jong ki samla namar ka jingbym ïoh kam ïoh jam”, u la ong.
U Dr. Mukul Sangma u la ong ba ka khubor kaba donkam na kane ka ilekshon ka long sha baroh, ym tang ïa ki nongshong shnong ka Meghalaya hynrei ïa ka thaiñ baroh kawei bad ka ri India, ba ka saiñpyrthei ka la kylla.
Haba pynpaw ba ka jingthaw kam ka long kaba eh ïa ka Sorkar, u MLA ka Songsak u la kynnoh ba ka Sorkar kaba mynta kam patiaw ban pyndap ïa ki kam ba lait hadien ba la don kiba la shongthait noh, kiba la kiew kyrdan bad ba la khlad noh, ha kaba u la ong ba da ki hajar tylli ki kam Sorkar kiba la shuh ieh khlem pyndap shuh.
