Shillong, Rymphang 28
U President ka Voice of the People Party (VPP), Bah Ardent Miller Basaïawmoit u la pynpaw ba ka long kaba donkam ban ïatreilang bad ka Sorkar na ka bynta ka jingbha bad ka roi ka par jong ki paidbah ka Jylla, bad ka seng kam kwah ban ïaleh pyrshah ïa ka Sorkar.
Haba kren ha ka Sngi Thohdieng u Nongïalam ka VPP u la ong ba ka seng kam sngewtynnat ban ïaleh pyrshah ïa ka Sorkar Jylla.
“Ngi la kren ïa kane la bun sien, wat hadien ba ngi la jop ïa ka ilekshon MP. Ngim kwah ban ïaleh pyrshah ïa ka Sorkar Jylla. Na ka bynta ka jingbha bad ka bit ka biang ki paidbah ngin ïatreilang, dei na kata ka daw ba u MP jong ngi u don bynta ha ka ban leit sha ki jaka bapher-bapher bad rah ruh ïa ki mat bad ka Sorkar Pdeng, ym ban ïaleh pyrshah bad ka Sorkar Jylla”, u la ong.
U Bah Ardent u la ong ruh ba ka shong ha ka Sorkar Jylla.
“Lada ki kwah ban ïaleh pyrshah ïa ngi, ngi ruh ngi long kiba pynkhreh, hynrei na ka liang jong ngi ngim kwah ban ïaleh pyrshah ïa ki. Ngi kwah ban ïatreilang na ka bynta ban kyntiew ïa ka roi ka par hapoh ka Jylla bad na ka bynta ka bit ka biang jong ki paidbah”, u la ong shuh shuh.
Haba pynpaw halor ki jingïakawang nia ha ka por ilekshon, une u Nongïalam ka VPP u la ong, “Ngi lah ban don ka jingsngewpher ha ka por ilekshon halor bun tylli ki mat ym dei pat ha ka synshar-khadar, ngim kwah ban wanrah kino-kino ki jingeh namar kane kam dei ka jingïakhun hapdeng ka VPP bad ka NPP, hynrei ka dei ka jingïakhun halor ki nongrim bad ki mat. Mynta ki paidbah ki la jied ïa ngi ha ka bor, kumta ngin ïaid bad ki kamram jong ngi, ym pat da kaba ïaleh pyrshah ïano-ïano, hynrei lada don kiba ïeng pyrshah ïa ngi, ngi hap ban ïakhun”.
Ha kawei pat ka liang u Bah Ardent u la ong ba ka seng kan leh kumba ka la kren, da kaba pynthikna ba kan ym don ka jingthung Chairman ïa ki MDC ha Khasi Hills Autonomous District Council (KHADC) ba ka seng ka ïalam ïa ka executive committee.
U la ong ba ka VPP ka la shim ïa ka sienjam kaba khraw da kaba pynrit ïa ka executive committee sha ka 8 ngut ban pyllait na ka jingpynsyrwa kai ïa ka pisa.
Haba kylli halor ka rai ban ym thung Chairman ba ka lah ban ktah ïa ka jingtreikam ka district council, na ka liang u Bah Ardent u la ong ba kan ym don jingeh, namar ïa ki kam lah ban shim khia da ki ophisar bad ka executive committee.
